Mumbai : आशा भोसले यांना अखेरचा निरोप; सचिन तेंडुलकर भावूक, मीनाताई खडीकर व्हिलचेअरवरून अंत्यदर्शनासाठी उपस्थित

Mumbai : भारतीय संगीतविश्वातील स्वरसम्राज्ञी आशा भोसले यांनी वयाच्या ९२ व्या वर्षी अखेरचा श्वास घेतला. रविवारी दुपारी १२.०२ वाजता मुंबईतील ब्रीच कँडी हॉस्पिटल येथे त्यांचे निधन झाले. त्यांच्या पार्थिवावर अंतिम दर्शनासाठी लोअर परळ येथील कासा ग्रँडे या निवासस्थानी ठेवण्यात आले होते.

आशाताईंच्या निधनाने संगीतविश्वात आणि चाहत्यांमध्ये शोककळा पसरली आहे. तब्बल आठ दशकांच्या कारकिर्दीत त्यांनी हजारो गाणी गाऊन रसिकांच्या मनावर अधिराज्य गाजवले.

सचिन तेंडुलकर यांना अश्रू अनावर

अंत्यदर्शनासाठी आलेल्या सचिन तेंडुलकर यांना आशाताईंच्या निधनाचे दु:ख सहन झाले नाही. “क्रिकेटचा देव” म्हणून ओळखल्या जाणाऱ्या सचिन यांच्या डोळ्यांतून अश्रू वाहताना दिसले.

ए. आर. रहमान यांची उपस्थिती

प्रसिद्ध संगीतकार आर. रहमान यांनीही मुंबईत येऊन आशाताईंना श्रद्धांजली अर्पण केली. चित्रपटसृष्टीतील अनेक कलाकार, गायक आणि संगीतकार यावेळी उपस्थित होते.

मीनाताई खडीकर व्हिलचेअरवर

आशा भोसले यांच्या ९४ वर्षीय मोठ्या भगिनी मीना खडीकर या व्हिलचेअरवर बसून आपल्या धाकट्या बहिणीला अखेरचा निरोप देण्यासाठी आल्या होत्या. त्यांना पाहून उपस्थितांच्या डोळ्यांत पाणी आले.

सुप्रिया सुळे यांची श्रद्धांजली

राजकीय क्षेत्रातील नेत्यांनीही आशाताईंना आदरांजली वाहिली. सुप्रिया सुळे यांनी त्यांच्या निवासस्थानी जाऊन श्रद्धांजली अर्पण केली.

मुख्यमंत्री फडणवीस यांचे दर्शन

महाराष्ट्राचे मुख्यमंत्री देवेंद्र फडणवीस यांनी रविवारीच आशाताईंच्या पार्थिवाचे दर्शन घेऊन आदरांजली वाहिली.

रितेश देशमुख यांची उपस्थिती

बॉलिवूड अभिनेता रितेश देशमुख हेही अंत्यदर्शनासाठी उपस्थित होते.

अद्वितीय कारकीर्द

आशा भोसले यांनी बालगीते, लावणी, कॅब्रे, उडत्या चालीची गाणी, भावगीत, भक्तिगीत अशा विविध प्रकारांत आपला ठसा उमटवला. त्यांच्या आवाजाने अनेक पिढ्यांचे मनोरंजन केले.

त्यांच्या निधनामुळे भारतीय संगीतविश्वात मोठी पोकळी निर्माण झाली असून, रसिकांच्या मनात कायमची आठवण राहील.