आंध्र प्रदेश: देवाच्या दर्शनाला नेले अन् संपवले, प्रियकराच्या मदतीने पत्नीनेच केला पतीचा निर्घृण खून; आंध्र प्रदेशात खळबळ

आंध्र प्रदेश: चित्तूर जिल्ह्यात माणुसकीला काळीमा फासणारी एक धक्कादायक घटना उघडकीस आली आहे. २३ वर्षीय रमेश या तरुणाची त्याच्याच पत्नीने आणि तिच्या प्रियकराने मिळून निर्घृण हत्या केली. रमेश हा मूळचा तामिळनाडूचा होता आणि पत्नी हसिनीसह (वय १९) त्यांचा संसार सुखाचा सुरू होता. हसिनीचे तिच्या बालपणीच्या मित्रासोबत, युगंधर (वय २०) सोबत प्रेमसंबंध होते. हसिनीने पतीला अमावस्येनिमित्त मल्लप्पा कोंडा येथील मल्लेश्वर स्वामी मंदिरात दर्शनासाठी जाण्यास प्रवृत्त केले. वाटेत तिने आपले 'लाईव्ह लोकेशन' प्रियकर युगंधरला पाठवून त्याला कटात सामील करून घेतले.

घाटाच्या रस्त्यावर हसिनीने मुद्दाम आपली बॅग खाली टाकली, जेणेकरून पती रमेशने गाडी थांबवावी. रमेशने गाडी थांबवताच युगंधर आणि त्याच्या साथीदारांनी लपून हल्ला केला. रमेशने वाचण्यासाठी जंगलात पळ काढला, मात्र हल्लेखोरांनी पाठलाग करून धारदार शस्त्राने त्याची हत्या केली. या घटनेच्या वेळी त्यांची एक वर्षाची चिमुरडी मुलगीही तिथेच होती. सीसीटीव्ही फुटेज आणि तांत्रिक पुराव्यांच्या आधारे पोलिसांनी हसिनी आणि तिच्या प्रियकराला अटक केली आहे.