Amravati Crime : वाळू तस्करीला विरोध; युवकावर प्राणघातक हल्ला, तीन जण पोलिसांच्या ताब्यात

Amravati : आजही अवैध वाळू तस्करी जोरदार सुरु आहे. वाळू वाहतुकीला मनाई असताना देखील चोरून वाळूची वाहतूक मोठ्या प्रमाणात केली जात आहे. अशाच प्रकारे अवैध वाळू वाहतूक करणाऱ्याला विरोध केल्याने एका युवकावर तलवार व कोयत्याने वार करत प्राणघातक हल्ला करण्यात आल्याची घटना अमरावती जिल्ह्यातील आसेगाव पोलीस ठाणे अंतर्गत परिसरात घडली. यात हल्लेखोराला पोलिसांनी ताब्यात घेतले आहे.

अमरावतीच्या आसेगाव पोलीस स्टेशन अंतर्गत घडलेल्या या घटनेने परिसरात खळबळ उडाली आहे. या घटनेत अजय कावरे हा युवक गंभीर जखमी झाला आहे. आसेगाव पोलीस स्टेशन अंतर्गत असलेल्या गावात अनिकेत वाट हा विरूळपूर्णा येथील नदीवरून अवैध रेती तस्करीचा व्यवसाय केला जात होता. वाळू तस्करी करत असल्याने या तस्करीला गावातील नागरिकांनी विरोध केला होता. वाळू तस्करी रोखल्याने त्याचा राग मनात होता.

भेटायला बोलावत केला हल्ला

दरम्यान वाळू तस्करी रोखल्याने असता याचा वचपा काढत अजय कावरे याला अनिकेत वाट यांनी आसेगाव पूर्णा येथे भेटायला बोलावले. यानंतर त्याच्यावर दहा ते बारा जणांनी तलवार, कोयता व लोखंडी रॉडने मारहाण केली; असा आरोप अजय कावरे याने केला आहे. यामध्ये अजय कावरे हा गंभीर जखमी झाला असून या प्रकरणी पोलिसात तक्रार दाखल करण्यात आली होती.

तिघांना पोलिसांनी घेतले ताब्यात

या प्रकरणी आसेगाव पोलीस ठाण्यात तक्रार दाखल झाल्यानंतर अनिकेत वाटसह त्याच्या मित्रावर गुन्हा दाखल करण्यात आला. यानंतर अनिकेत वाट याच्यासह तिघांना पोलिसांनी अटक केली आहे. तसेच या सर्वांना दोन दिवसाची पोलीस कोठडी देखील देण्यात आली आहे. अनिकेत वाट भाजपाचा कार्यकर्ता असल्याचे समजते.