छत्रपती संभाजीनगरमध्ये बुलडोझर अ‍ॅक्शन! निदा खानला आश्रय देणाऱ्या 'एमआयएम' नेत्याचे घर जमीनदोस्त

छत्रपती संभाजीनगर: नाशिक येथील बहुचर्चित टीसीएस (TCS) प्रकरणातील मुख्य संशयित आरोपी निदा खान हिला आश्रय दिल्याचा ठपका असलेले एमआयएम (AIMIM) नगरसेवक मतीन पटेल यांच्यावर प्रशासनाने मोठी कारवाई केली आहे. छत्रपती संभाजीनगर महानगरपालिकेच्या अतिक्रमण विभागाने बुधवारी सकाळीच मतीन पटेल यांच्या कौसर पार्क येथील घरावर आणि नारेगाव येथील कार्यालयावर बुलडोझर चालवून ते जमीनदोस्त केले.

नाशिकच्या धर्मांतर आणि फसवणूक प्रकरणातील आरोपी निदा खान हिला मतीन पटेल यांनी आपल्या घरात लपवून ठेवल्याचा आरोप आहे. या प्रकरणाचे गांभीर्य लक्षात घेऊन महापालिकेने यापूर्वीच मतीन पटेल यांच्या मालमत्तांची तपासणी सुरू केली होती. या मालमत्ता बेकायदा असल्याचा दावा करत पालिकेने त्यांना कागदपत्रे सादर करण्यासाठी नोटीस बजावली होती. पटेल यांनी उच्च न्यायालयाच्या औरंगाबाद खंडपीठात या कारवाईला स्थगिती मिळावी म्हणून धाव घेतली होती, मात्र खंडपीठाने कारवाईला स्थगिती देण्यास नकार दिला.

मंगळवारी महापालिकेने २४ तासांची अंतिम नोटीस बजावली होती. मुदत संपताच आज पहाटे महापालिकेचे पथक फौजफाट्यासह घटनास्थळी पोहोचले आणि अवैध बांधकाम पाडण्यास सुरुवात केली. राजकीय सूडबुद्धीने ही कारवाई होत असल्याचा आरोप मतीन पटेल यांच्याकडून करण्यात आला असला, तरी महापालिकेने कायदेशीर प्रक्रिया पूर्ण करूनच हे पाऊल उचलल्याचे स्पष्ट केले आहे. या कारवाईमुळे शहरात मोठी खळबळ उडाली आहे.