Accident News : पेट्रोलच्या टँकरला अपघात, वाऱ्यासारखी खबर पसरली; मिळेल ते भांडं घेऊन गावकरी पोहचले, पेट्रोल भरण्यासाठी एकच झुंबड

Accident News : अहिल्यानगरमध्ये पेट्रोलचा टँकर पलटी होऊन भीषण अपघात झाला. या अपघातामध्ये टँकर चालक गंभीर जखमी झाला. हा अपघात झाल्यानंतर गावागावामध्ये वाऱ्यासारखी बातमी पसरली. मग काय पेट्रोल भरण्यासाठी नागरिकांनी अपघातग्रस्त टँकरच्या बाजूने घोळका केला. मिळेल्या त्या भाड्यामध्ये पेट्रोल भरून गावकरी पसार झाले. याचा व्हिडीओ समोर आला असून तो सध्या सोशल मीडियावर व्हायरल होत आहे.

मिळालेल्या माहितीनुसार, अहिल्यानगरच्या करंजी घाटात २० हजार लिटर क्षमतेचा पेट्रोलचा टँकर पलटी होऊन अपघात झाला. सकाळी साडेआठ वाजण्याच्या सुमारास हा अपघात झाला. मुंबईवरून परभणीच्या दिशेने हा टँकर निघाला होता. पण वाटेतच घाटामध्ये हा टँकर पलटी झाला. टँकरचा ब्रेकफेल झाल्याने माणिकशहा पीरबाबा दर्ग्याजवळ टँकर पलटी झाला. या अपघातामध्ये टँकर चालक गंभीर जखमी झाला.

Success Story : हेलिकॉप्टर, फायटर जेट बघायचे..., अखेर ते स्वप्न सत्यात उतरलं, NDA च्या परीक्षेत देशात पहिली आलेला ऋतुजा वऱ्हाडेची यशोगाथा

पेट्रोलच्या टँकरला अपघात झाल्याचे कळताच आसपासच्या गावातील नागरिकांनी घटनास्थळी मोठी गर्दी केली. ज्याला जे शक्य होईल त्या वस्तू ते पेट्रोल भरून घेऊन जाण्यासाठी घेऊन आले. कुणी पाण्याच्या बाटल्या, कुणी पाण्याचे कँड तर कुणी दुधाच्या किटल्या घेऊन आले आणि त्यामध्ये पट्रोल भरून ते पसार देखील झाले. अपघातानंतर टँकरमधून पेट्रोलची मोठ्या प्रमाणात गळती सुरू होती त्यामुळे माणिकशहा पीरबाबा दर्ग्याजवळ रस्त्यावर सगळीकडे पेट्रोल पसरले होते.

घटनेची माहिती मिळताच पाथर्डी पोलीस स्टेशन आणि महामार्ग पोलिसांनी घटनास्थळी धाव घेतली. अहिल्यानगर आणि पाथर्डीतून अग्निशमन दलाच्या दोन गाडयांनी घटनास्थळी धाव घेतली. या अपघातामुळे सुमारे दोन तास वाहतूक ठप्प झाली होती. या अपघातामध्ये मकबल पठाण हा टँकर चालक गंभीर जखमी झाला असून त्याच्यावर रुग्णालयात उपचार सुरू आहेत.