Nashik : एक कोटीची डील; पहिला हप्ता 20 लाखाचा, नाशिकचा GST अधिकारी मुंबई ACBच्या जाळ्यात

Nashik : लाचलुचपत प्रतिबंधक विभागाच्या (एसीबी) कार्यक्षेत्रात नाशिकमधील लाचखोरीच्या तक्रारी थेट मुंबईत पोहोचून तेथून अधिकारी येत नाशिकमध्ये सापळे रचून लाचखोरांना बेड्या ठोकत असल्याचे वास्तव आहे. दोन महिन्यांत सलग दुसऱ्यांदा या स्वरूपाची कारवाई झाली असून, आता मुंबई पथकाने नाशिकच्या जीएसटी अधिकाऱ्यांसह खासगी व्यक्तीला अटक केली आहे. तरीही नाशिक एसीबीच्या पथकाने कानावर हात ठेवल्याने कार्यपद्धतीवर बोट ठेवले जात आहे.

विशेष म्हणजे, मुंबईचे पथक सापळा रचून फिर्याद दिल्यानंतर नाशिकच्या पथकाकडे तपास सोपविण्यात येतो. मात्र, त्यानंतर मालमत्तेची घरझडती, जप्ती व इतर तपासासंदर्भात स्पष्टपणे माहिती देण्यास अथवा पुढील कार्यवाहीबाबत कमालीची गोपनीयता बाळगण्यात नाशिक ‘एसीबी’चे पथक धन्यता मानत आहे.

दरम्यान, जीएसटी कार्यालयातील राज्यकर उपायुक्त संशयित सोमनाथ दत्तू पागे आणि सहायक राज्यकर आयुक्त मच्छिंद्र विठ्ठल दोंदे यांनी तक्रारदाराच्या कार्यालयातील तपासणी पूर्ण करण्यासाठी सव्वा कोटी रुपयांची मागणी केली होती. तडजोडीअंती एक कोटी रुपये देण्याचे ठरले आणि त्याचा पहिला हप्ता म्हणून २० लाख रुपये स्वीकारताना अमित हिरामण जाधव या खासगी व्यक्तीला मुंबई ‘एसीबी’चे सहायक पोलिस आयुक्त विजय चव्हाण यांच्या पथकाने ताब्यात घेतले. तक्रार प्राप्त झाल्यानंतर पाच दिवसांत मुंबईच्या पथकाने ही कारवाई केली.

या कारवाईनंतर कार्यालयीन झडतीमध्ये दोन लाख रुपये जप्त करण्यात आले आहेत. संशयितांचे मोबाइल, दुचाकी आणि कार असा मुद्देमाल ताब्यात आहे. मात्र, या जप्तीचे सविस्तर विवरण आणि घरझडतीचा ठोस तपशील देण्यास नाशिक ‘एसीबी’ने असमर्थता दर्शविली आहे. तक्रारदार स्थानिक विभागाकडे न जाता थेट मुंबईला का जात आहेत, अशी कुजबुज पोलिस दलात ऐकू येत आहे