Women's Day Special : भुयारी मेट्रोची धुरा महिलांकडे; CSMT आणि मरोळ नाका स्थानकांची जबाबदारी महिला कर्मचाऱ्यांकडे

Mumbai : आंतरराष्ट्रीय महिला दिनानिमित्त मुंबई मेट्रो रेल कॉर्पोरेशनकडून एक विशेष उपक्रम राबविण्यात येत आहे. रविवारी मुंबई मेट्रो मार्गिका तीन अर्थात अ ॅक्वा मार्गिकेवरील मरोळ नाका आणि छत्रपती शिवाजी महाराज टर्मिनस या दोन महत्त्वपूर्ण मेट्रो स्थानकांचे संचलन महिला कर्मचाऱ्यांकडून करण्यात येणार आहे. शहरी वाहतूक क्षेत्रामध्ये महिलांचा वाढता सहभाग आणि महिलांच्या सक्षमीकरणाचा संदेश याद्वारे देण्यात येणार आहे.

 

दोन स्थानकं महिलांहाती
सीएसएमटी आणि मरोळ नाका या दोन्ही स्थानकांवरील स्थानक नियंत्रण, तिकीटविक्री सुविधा, प्रवासी सहाय्य, सुरक्षा व्यवस्था, देखभाल सहाय्य आणि देखभाल अशा विविध जबाबदाऱ्या महिला कर्मचारी वर्गाकडून पार पाडण्यात येणार आहेत. दिवसभरातील वेगवेगळ्या शिफ्टमध्ये मिळून एकूण ८५ महिला कर्मचारी या स्थानकांचे कामकाज सांभाळतील. मेट्रो तीनच्या संचालनामध्ये २७ महिला मेट्रो पायलट कार्यरत असणार आहेत. त्या नियमित मेट्रोगाड्यांचे संचालन करत आहेत. मुंबई मेट्रो रेल कॉर्पोरेशनमध्ये १,३८८ महिला कर्मचारी विविध स्तरांवर कार्यरत आहेत.

माटुंगा रेल्वे स्थानक
मध्य रेल्वेवरील माटुंगा रेल्वे स्थानक हे देशातील पहिले पूर्णपणे महिला कर्मचाऱ्यांकडून चालवले जाणारे रेल्वे स्थानक म्हणून ओळखले जाते. सन २०१७मध्ये या स्थानकाची नोंद ‘लिम्का बुक ऑफ रेकॉर्ड्स’मध्ये झाली होती. या स्थानकावर स्थानक व्यवस्थापक, तिकीट बुकिंग क्लार्क, घोषणा प्रणाली, फलाटावरील व्यवस्थापन, तसेच इतर प्रशासकीय कामकाज अशा सर्व महत्त्वाच्या जबाबदाऱ्या महिलांकडेच आहेत.

याच धर्तीवर पश्चिम रेल्वेवरील माटुंगा रोड रेल्वे स्थानक हे स्थानकही पूर्णपणे महिला कर्मचाऱ्यांद्वारे चालवले जाते. येथे स्थानक अधीक्षकापासून तिकीट तपासणी, बुकिंग कार्यालय, घोषणा प्रणाली आणि अन्य कामकाजाची जबाबदारी महिला कर्मचारी सांभाळतात. या उपक्रमामुळे रेल्वे प्रशासनात महिलांचा सहभाग वाढवण्यास चालना मिळाली असून महिला सक्षमीकरणाला बळकटी मिळाली आहे.

कॉर्पोरेट क्षेत्रातही महिला दिनाचा उत्साह
महिलांच्या सामाजिक, आर्थिक, सांस्कृतिक आणि राजकीय कामगिरीचा सन्मान करण्यासाठी आणि लैंगिक समानतेसाठी साजऱ्या होणाऱ्या आंतरराष्ट्रीय महिला दिनाचा कॉर्पोरेट क्षेत्रातही विशेष उत्साह आहे. यंदा हा दिवस रविवारी आल्याने अनेक कंपन्यांमध्ये या निमित्त शुक्रवारपासूनच विविध कार्यक्रमांचे आयोजन करण्यात आले होते. महिला कर्मचाऱ्यांसाठी आरोग्य शिबिरे, आहारतज्ज्ञांचे सल्ले, आदी कार्यक्रमांसोबतच भेटवस्तूंची रेलचेल होती. यंदा अनेक कॉर्पोरेट कंपन्यांनी मानसिक आरोग्यासाठी समुपदेशन कार्यक्रमही आयोजित केले.