पुणे; पिंपरी - चिंचवड पोलिस कारवाईत ७४ किलो गांजा जप्त मुद्देमाल किंमत सुमारे ३७ लाख

पुणे/सांगवी: पिंपरी-चिंचवड पोलीस आयुक्तालयांतर्गत येणाऱ्या सांगवी पोलिसांनी अंमली पदार्थ तस्करांविरुद्ध एक मोठी मोहीम फत्ते केली आहे. रात्रीच्या गस्तीदरम्यान सुरू झालेल्या या कारवाईचा धागा थेट दौंडपर्यंत पोहोचला असून, पोलिसांनी तब्बल ७४ किलो गांजा जप्त केला आहे. या मुद्देमालाची किंमत सुमारे ३७ लाख ९ हजार रुपये इतकी आहे.

 

कारवाईची सुरुवात अशी झाली:
१६ एप्रिल रोजी सांगवी पोलिसांचे पथक रात्रीच्या वेळी गस्त घालत होते. यावेळी त्यांना गणेश कैलास चव्हाण (वय ३०, रा. शिरूर) हा तरुण एका दुचाकीवर पोते बांधून संशयास्पद स्थितीत उभा असलेला दिसला. पोलिसांनी त्याची झडती घेतली असता, त्याच्याकडे १४ किलो गांजा मिळून आला. पोलिसांनी त्याला तत्काळ ताब्यात घेऊन चौकशी सुरू केली.

गोठ्यात लपवला होता गांजाचा साठा:
पोलिसी खाक्या दाखवताच आरोपी गणेश चव्हाण याने गुन्ह्याची कबुली दिली आणि आपला आणखी एक साथीदार या तस्करीत सामील असल्याचे सांगितले. तसेच, उरलेला मोठा साठा दौंड तालुक्यातील पाटेठाण येथील साथीदाराच्या घरी लपवल्याची माहिती दिली. सांगवी पोलिसांनी तातडीने दौंडमधील पाटेठाण येथे छापा टाकला. तिथे चक्क जनावरांच्या गोठ्यात गोण्यांमध्ये भरून ठेवलेला ६० किलो गांजा पोलिसांना सापडला.

पोलिसांचा तपास:
या कारवाईत पोलिसांनी एकूण ७४ किलो गांजा, मोबाईल आणि दुचाकी असा एकूण ३७ लाखांचा मुद्देमाल जप्त केला आहे. वरिष्ठ पोलीस निरीक्षक जितेंद्र कोळी यांच्या मार्गदर्शनाखाली ही कारवाई करण्यात आली. आरोपी गणेश चव्हाण याला अटक करण्यात आली असून, त्याचा फरार साथीदार जो दौंड येथील घराचा मालक आहे, त्याचा शोध पोलीस घेत आहेत. हे आरोपी इतर राज्यांतून गांजा आणून पुणे आणि पिंपरी-चिंचवड परिसरात विक्री करत असल्याचे प्राथमिक तपासात समोर आले आहे.