लग्न झालं, पंगत बसली अन् झाला रक्तरंजित राडा, चाकूने सपासप वार; थरकाप उडवणारी घटना महाराष्ट्रात कुठे घडली?

बुलढाण्यातील कोलवड इथं लग्नाच्या आनंदी वातावरणाचं रुपांतर रक्तरंजित घटनेत झालं. लग्नसमारंभाला हिंसाचाराचं गालबोट लागलं. कावड यात्रेदरम्यान झालेल्या जुन्या वादातून तरुणावर चाकूने हल्ला करण्यात आला. या धक्कादायक घटनेत एक जण गंभीर जखमी झाला असून चाकूहल्ला करणारे आरोपी फरार आहेत. ही संपूर्ण घटना सीसीटीव्ही कॅमेरामध्ये कैद झाली आहे. याप्रकरणी बुलढाणा शहर पोलिसांत दोघांविरोधात गुन्हा दाखल करण्यात आला आहे.

नेमकं काय घडलं?

गावातील एका लग्नसमारंभात गौरव जाधव नावाचा तरुण उपस्थित होता. लग्नसोहळ्यादरम्यान पंगतीत जेवताना त्याचा दुसऱ्या तरुणाशी वाद झाला. काही दिवसांपूर्वी पार पडलेल्या कावड यात्रेदरम्यान गौरवचा गावतल्या नितीन सपकाळ या तरुणाशी वाद झाला होता. त्याच कारणावरून लग्नातील जेवणाच्या पंगतीत पुन्हा या दोघांमधील वाद चिघळला. हा वाद वाढताच नितीन सपकाळ याने त्याच्यासोबत असलेल्या मयुरेश दसरकर याच्याकडील चाकू आपल्या हातात घेतला अन् गौरवर सपासप वार केले.

या हल्ल्यात गौरव जाधव गंभीर जखमी झाला असून त्याला तातडीने जिल्हा सामान्य रुग्णालयात उपचारासाठी दाखल करण्यात आलं आहे. गौरववर सध्या रुग्णालयात उपचार सुरू आहेत. गौरव आणि नितीन यांच्यातील भांडण सोडवण्यासाठी लग्नातल्या काही पाहुण्यांनी पुढाकार केला असता त्यात तेसुद्धा किरकोळ जखमी झाले. अरुण जाधव नावाच्या व्यक्तीला दुखापत झाल्याची माहिती आहे. या घटनेप्रकरणी पोलिसांत तक्रार नोंदवल्यानंतर बुलढाणा शहर पोलिसांनी गुन्हा दाखल केला आहे. याप्रकरणाची पुढील तपासणी पोलीस करत आहेत. दोन्ही आरोपी सध्या फरार असून पोलीस आरोपींचा शोध घेत आहेत. बुलढाण्यात भर लग्नसमारंभात चाकूहल्ल्यासारखी धक्कादायक घटना घडल्याने ग्रामस्थांमध्ये भीतीचं वातावरण निर्माण झालं आहे.

घटनेनंतर समोर आलेल्या सीसीटीव्हीमध्ये नितीन आणि गौरव यांच्यात झालेला वाद स्पष्ट पहायला मिळतोय. लग्नसमारंभानंतर जेवणाची पंगत सुरू असताना अचानक दोघं एकमेकांशी भांडू लागतात. यादरम्यान इतर काहीजण त्यांची मध्यस्थी करत वाद मिटवण्याचा प्रयत्न करतात. परंतु तितक्यात एक तरुण चाकूने दुसऱ्यावर सपासप वार करतो आणि तिथून पळून जातो. ही संपूर्ण घटना सीसीटीव्ही फुटेजमध्ये पहायला मिळत आहे. या फुटेजच्या आधारे पोलीस आरोपींचा शोध घेत आहेत.