मोहन भागवतांनी सर्व गैरसमज..; RSS च्या कार्यक्रमानंतर अदनान सामीची पोस्ट चर्चेत

मुंबईत राष्ट्रीय स्वयंसेवक संघाचा (आरएसएस) दोन दिवसीय शताब्दी समारोह आयोजित करण्यात आला होता. हा समारोह बॉलिवूडमधील अनेक सेलिब्रिटींच्या उपस्थितीमुळे चर्चेचा विषय ठरला होता. कार्यक्रमाच्या पहिल्या दिवशी सलमान खान, रणबीर कपूर यांसारखे सुपरस्टार हजर होते. तर दुसऱ्या दिवशी रविवारी विकी कौशल आणि अनन्या पांडे यांसारख्या सेलिब्रिटींची उपस्थिती पहायला मिळाली. संघाला 100 वर्षे पूर्ण झाल्यानिमित्ताने आयोजित या कार्यक्रमात उपस्थित राहिलेल्या सेलिब्रिटींनी सरसंघचालक मोहन भागवत यांचं भाषण मन:पूर्वक ऐकलं होतं.

कार्यक्रमाच्या दुसऱ्या दिवशी अभिनेता विकी कौशल पारंपरिक अंदाजात दिसून आला. कुर्ता-पायजमा परिधान करून तो त्याच्या आगामी ‘लव्ह अँड वॉर’ या चित्रपटातील खास लूकमध्ये दिसला. तर अनन्या पांडेसुद्धा पारंपरिक पोशाख परिधान करून या कार्यक्रमात उपस्थित राहिली. याशिवाय निर्माता – दिग्दर्शक करण जोहर, मधुर भंडारकार, शिल्पा शेट्टी, अक्षय कुमार, सुभाष घई, रवीना टंडन आणि जॅकी श्रॉफ यांसारखे बरेच सेलिब्रिटी याठिकाणी दिसले.

दुसरीकडे पाकिस्तानला सोडून भारताचं नागरिकत्व स्वीकारणारा गायक अदनान सामी याने सोशल मीडियावर मोहन भागवत यांच्यासोबतचे काही फोटो पोस्ट केले आहेत. या फोटोंमध्ये शिल्पा शेट्टी, रुपाली गांगुली आणि रमेश तौरानी हेसुद्धा दिसत आहेत. या फोटोंसोबत अदनानने लिहिलं, ‘आरएसएसचे दिग्गज सरसंघचालक मोहन भागवत यांच्यासोबत उत्तम वेळ घालवला. त्यांचं भाषण मला खूप आवडलं आणि त्यांनी बरेच गैरसमजसुद्धा दूर केले. मिथकांबद्दलही त्यांनी चांगल्या प्रकारे समजावून सांगितलं आणि ते दूर केले. अत्यंत अविश्वसनीय सज्जन आणि सुंदर व्यक्ती.’

Had an incredible afternoon with the legendary Sarsanghchalak (Chief) of RSS, Sri Mohan Bhagwat ji. It was delightful to hear him speak and there were so many myths & misconceptions that he so eloquently explained & cleared. An incredible gentleman & beautiful soul… pic.twitter.com/rL3zQqA4cX

— Adnan Sami (@AdnanSamiLive) February 8, 2026

करण जोहरने सोशल मीडियावर लिहिलं, ‘मी इथे आरएसएसला 100 वर्षे पूर्ण झाल्यानिमित्ताने आलो आहे आणि इथे मोहन भागवत यांचं भाषण ऐकलं. राष्ट्रीय स्वयंसेवक संघाला 100 वर्षे पूर्ण झाल्याबद्दल मी त्यांना शुभेच्छा देतो. त्यांचे शब्द फक्त प्रेरणादायीच नव्हे तर त्यात दमदार विनोदबुद्धीही होती.’

#WATCH | Mumbai, Maharashtra: On RSS’ Two-Day Lecture Series on ‘100 Years of Sangh Journey’, Producer Karan Johar says, “… I came here on the occasion of 100 years of the RSS and heard Mohan Bhagwat’s insightful lecture. I extend my best wishes to the RSS on its 100th… pic.twitter.com/3qKFif5DU2

— ANI (@ANI) February 8, 2026

अभिनेता सलमान खान या कार्यक्रमाच्या पहिल्या दिवशी तिथे उपस्थित होता. तोसुद्धा मोहन भागवतांच्या भाषणाला हजर होता. यावेळी सामाजिक ट्रेंड आणि फॅशनच्या प्रभावाविषयी बोलताना भागवत म्हणाले की, समाजातील लोक अनेकदा प्रभावशाली लोकांकडे पाहून ट्रेंड फॉलो करतात. यावेळी त्यांनी सलमानचं उदाहरण दिलं. “कॉलेजमधील विद्यार्थी तसेच कपडे घालतात, जसे सेलिब्रिटी घालतात. त्यांना कारण माहीत नसलं तरी ते फॅशन फॉलो करतात. फॅशन तयार करणारे लोक समाजात विश्वासार्ह आणि आदरणीय मानले जातात”, असं ते पुढे म्हणाले.