ठाणे: घोडबंदर रोडवर भीषण अपघात! भरधाव टँकर रिक्षावर पलटला; चालकासह दोघांचा जागीच मृत्यू

 ठाणे: घोडबंदर रोडवर झालेल्या भीषण अपघातात दोन जणांचा दुर्दैवी मृत्यू झाला असून एक जण गंभीर जखमी झाला आहे. भरधाव टँकरचा चालक नियंत्रण गमावल्याने टँकर रस्त्यावरून घसरत थेट एका ऑटो रिक्षावर पलटला. या भीषण अपघातात रिक्षाचालकासह एका प्रवाशाचा जागीच मृत्यू झाला, तर आणखी एक प्रवासी गंभीर जखमी झाला आहे.

अपघातानंतर घटनास्थळी मोठी गर्दी झाली. स्थानिक नागरिकांनी तातडीने पोलिस आणि अग्निशमन दलाला माहिती दिली. बचाव पथकांनी मोठ्या प्रयत्नांनंतर टँकरखाली अडकलेल्या रिक्षेला बाहेर काढले. जखमीला तातडीने जवळच्या रुग्णालयात दाखल करण्यात आले असून त्याच्यावर उपचार सुरू आहेत.

घटनेनंतर घोडबंदर रोडवरील वाहतूक काही काळ विस्कळीत झाली होती. पोलिसांनी क्रेनच्या मदतीने टँकर हटवून वाहतूक पूर्ववत केली. अपघाताचे नेमके कारण शोधण्यासाठी पोलिसांनी तपास सुरू केला असून टँकर चालकाच्या निष्काळजीपणाचा कोनही तपासला जात आहे.