पुणे: लवळे फाट्या जवळ भीषण साखळी अपघात! सिमेंटचा ट्रक, डंपर, टेम्पो आणि दोन दुचाकींमध्ये जोरदार धडक; एक जण जागीच ठार, दोघे गंभीर जखमी

पुणे: कोलाड महामार्गावर असलेल्या लवळे फाटा (ता. मुळशी) येथे शनिवार (दि. ३) रोजी सकाळी सव्वा आठ वाजण्याच्या सुमारास भीषण अपघात झाला असून यामध्ये सिमेंट वाहतूक करणाऱ्या भरधाव ट्रकने रस्त्याच्या कडेला उभ्या असलेल्या डंपर सह आयशर टेम्पो आणि दोन दुचाकींना जोरदार धडक दिली. तेव्हा या भीषण अपघातात एका व्यक्तीचा जागीच मृत्यू झाला असून चार जण जखमी झाले आहेत यापैकी दोघांची प्रकृती ही चिंताजनक असल्याची माहिती मिळत आहे.

या बाबतचे वृत्त असे की पुण्याहून पौडच्या दिशेने सिमेंट घेऊन जाणारा ट्रक हा पिरंगुट घाटातून भरधाव वेगाने येत होता. घाटाच्या तीव्र उतारावर असलेल्या लवळे फाट्याजवळ घाट उतरून वेगाने खाली आला असता या ट्रकचे ब्रेक फेल झाले असल्याचा प्राथमिक अंदाज आहे त्यामुळे भरधाव वेगातील अनियंत्रित झालेल्या या ट्रकने समोर उभ्या असलेल्या डंपर गाडीला तसेच आयशर टेम्पो व दोन दुचाकींना जोरदार धडक दिली व धडकेनंतर हा ट्रक रस्त्याच्या एका बाजूला जाऊन एका भिंतीला धडकला या दुर्घटनेत या ट्रकचे पुढील चाक हे निखळून खाली पडले होते.

धडक इतकी भीषण होती की यामध्ये दुचाकीचा अक्षरशः चक्काचूर झाला आहे तर या दुचाकीवरून प्रवास करणाऱ्या लक्ष्मण कुबल (रा, गणेशनगर पिरंगुट ता, मुळशी) यांचा जागीच मृत्यू झाला, तर त्यांच्या पाठीमागे बसलेला व्यक्ती हा गंभीर जखमी झाला आहे तर उर्वरित जखमींवर रुग्णालयात उपचार सुरू आहेत. या अपघातानंतर पुणे कोल्हाड या महामार्गावर काही काळ वाहतूक ठप्प झाली होती. घटनेची माहिती मिळताच पिरंगुट पोलिसांनी आणि स्थानिक नागरिकांनी घटनास्थळी धाव घेत जखमींना तातडीने जवळच्या रुग्णालयात दाखल केले तर पोलिसांनी ट्रक चालकाविरुद्ध गुन्हा दाखल करून पुढील तपास सुरू केला आहे.
लवळे फाटा येथे वारंवार होणाऱ्या अपघातांमुळे या ठिकाणी कायमस्वरूपी उपाययोजना करण्याची मागणी वारंवार स्थानिक नागरिकांमधून होत आहे. परंतु अद्याप तरी प्रशासनाकडून यावर कुठलीही ठोस उपायोजना करण्यात आलेली नाही त्यामुळे नागरिकांमध्ये नाराजीचे वातावरण आहे.