पुण्यात १८ ते ३१ ऑगस्टदरम्यान जमावबंदी लागू; राहुल गांधींच्या 'छात्रों की गुंज' कार्यक्रमाच्या परवानगीचा प्रश्न ऐरणीवर!

पुणे शहरात आगामी सण-उत्सव, सामाजिक व राजकीय कार्यक्रम तसेच कायदा व सुव्यवस्था अबाधित राखण्याच्या दृष्टीने पुणे पोलीस प्रशासनाने मोठा आणि महत्त्वाचा निर्णय घेतला आहे. शहरात १८ ऑगस्टपासून म्हणजेच आजपासून ३१ ऑगस्ट २०२६ पर्यंत १४ दिवसांसाठी प्रतिबंधात्मक आदेश (जमावबंदी) लागू करण्यात आले आहेत. महाराष्ट्र पोलीस कायदा, १९५१ च्या कलम ३७ (१), (२) आणि (३) अंतर्गत हे आदेश पुणे शहर पोलीस आयुक्तालय क्षेत्रात लागू करण्यात आले आहेत.

पोलिस उपायुक्त (विशेष शाखा) यांच्या आदेशानुसार, हा प्रतिबंध १८ ऑगस्ट रोजी मध्यरात्री १२:०१ पासून ते ३१ ऑगस्ट रोजी मध्यरात्री १२ वाजेपर्यंत कायम राहणार आहे. या कालावधीत पुणे शहरात पाच किंवा त्यापेक्षा जास्त लोकांच्या जमावावर निर्बंध घालण्यात आले आहेत. तसेच विनापरवानगी मोर्चे, धरणे, निदर्शने, रॅली, मिरवणुका, जाहीर सभा आणि उपोषणे यांसारख्या आंदोलनांवर पूर्णपणे बंदी घालण्यात आली आहे. याशिवाय, सार्वजनिक सुरक्षेला धोका निर्माण करू शकणारी किंवा तेढ निर्माण करणारी आक्षेपार्ह भाषणे आणि सोशल मीडियावर दहशत पसरवणाऱ्या रील्स किंवा पोस्ट्सवर देखील प्रशासनाची करडी नजर असणार असून, नियमभंग करणाऱ्यांवर कठोर कायदेशीर कारवाईचा इशारा पोलिसांनी दिला आहे.

राहुल गांधींच्या कार्यक्रमाच्या परवानगीचा प्रश्न: सध्या या जमावबंदीच्या आदेशामुळे राजकीय वर्तुळात मोठी चर्चा रंगली आहे. येत्या २२ ऑगस्ट रोजी लोकसभेचे विरोधी पक्षनेते राहुल गांधी यांचा महत्त्वाकांक्षी असा 'छात्रों की गुंज' (Chhatron Ki Goonj) हा विद्यार्थ्यांसोबत संवाद साधणारा विशेष कार्यक्रम पुण्यात (शिवाजीनगर परिसरातील श्री शिवाजी प्रिपरेटरी मिलिटरी स्कूल मैदान) आयोजित करण्यात आला आहे. NEET परीक्षा आणि विद्यार्थी आंदोलनांच्या मुद्द्यावर आधारित या राष्ट्रीय अभियानाची तयारी अंतिम टप्प्यात आली असतानाच, प्रशासनाने १४ दिवसांची जमावबंदी लागू केल्याने या मोठ्या राजकीय आणि सामाजिक कार्यक्रमाच्या परवानगीबाबत मोठा प्रश्नचिन्ह निर्माण झाला आहे.

सण-उत्सव जसे की रक्षाबंधन, नारळी पौर्णिमा आणि ईद-ए-मिलाद या पार्श्वभूमीवर कायदा-सुव्यवस्था कायम ठेवण्यासाठी प्रशासनाने हे प्रतिबंधात्मक आदेश जारी केले आहेत. परंतु, या आदेशांच्या पार्श्वभूमीवर राहुल गांधींच्या सभेला आणि कार्यक्रमाला पुणे पोलीस पोलीस प्रशासनाकडून अधिकृत परवानगी मिळणार का, याकडे आता संपूर्ण राजकीय वर्तुळाचे लक्ष लागून राहिले आहे.