प्रसिद्ध संगीतकार ए.आर. रहमानच्या मुलाला अपघात: गायक ए.आर. अमीनच्या कारला चेन्नईत धडक, थोडक्यात बचावला!

चेन्नई: मनोरंजन सृष्टीतून एक मोठी आणि खळबळजनक बातमी समोर आली आहे. ऑस्करविजेते प्रसिद्ध संगीतकार ए.आर. रहमान यांचा मुलगा, गायक आणि संगीतकार ए.आर. अमीन (A.R. Ameen) याचा चेन्नईमध्ये भीषण कार अपघात झाला आहे. सोमवारी पहाटेच्या सुमारास घडलेल्या या अपघातात अमीन थोडक्यात बचावला असून त्याला आणि त्याच्या मित्राला किरकोळ दुखापत झाली आहे.

नेमकी घटना कशी घडली? पोलिसांनी आणि मिळालेल्या सविस्तर माहितीनुसार, ए.आर. अमीन हा आपल्या एका मित्रासोबत पोर्श (Porsche) कारने कोयंबेडू येथून चेन्नईच्या दिशेने प्रवास करत होता. पहाटे साडेतीनच्या (3:30 AM) सुमारास त्यांची कार चेन्नईतील ग्विंडी (Guindy) परिसरातील ऑलिम्पिया टेक पार्क सिग्नल जवळ आणि व्यस्त काथीपारा उड्डाणपुलाजवळआली. दरम्यान, एका साईड रोडवरून अचानक मुख्य रस्त्यावर आलेल्या वॅगन-आर (Wagon-R / कॅब) कारने अमीनच्या कारला जोरदार धडक दिली. हा अपघात इतका अचानक घडला की दोन्ही गाड्यांचे मोठे नुकसान झाले.

उपचार आणि पोलिसांची कारवाई: या अपघातात ए.आर. अमीन आणि त्याच्यासोबत असलेला मित्र किरकोळ जखमी झाले. त्यांना तातडीने उपचारासाठी चेन्नईच्या कावेरी रुग्णालयात दाखल करण्यात आले. प्राथमिक उपचार घेतल्यानंतर दोघांनाही डिस्चार्ज देण्यात आला असून ते सुरक्षितपणे घरी परतले आहेत. तसेच, दुसऱ्या कारमधील (वॅगन-आर मधील) जखमी प्रवाशाला उपचारासाठी कलैग्नार सेंटेनरी सुपर स्पेशालिटी हॉस्पिटलमध्ये दाखल करण्यात आले होते, जिथे उपचारानंतर त्यालाही घरी सोडण्यात आले.

या प्रकरणी अड्यार ट्रॅफिक इन्व्हेस्टिगेशन विंगच्या पोलिसांनी दोन्ही अपघातग्रस्त वाहने जप्त केली आहेत. पोलिसांनी या प्रकरणी अधिकृतपणे गुन्हा नोंदवला असून, नेमका अपघात कसा घडला याचा कसून तपास सुरू आहे.