डोंबिवलीत संतापजनक प्रकार! घर सोडून आलेल्या १६ वर्षीय मुलीला काम आणि निवाऱ्याचे आमिष दाखवून तिघांचा सामूहिक अत्याचार; मानपाडा पोलिसांकडून आरोपींना बेड्या

डोंबिवली (जि. ठाणे): डोंबिवली जवळच्या ग्रामीण परिसरातून एक अत्यंत धक्कादायक आणि चीड आणणारी घटना समोर आली आहे. कौटुंबिक वादानंतर घरातून निघून आलेल्या एका १६ वर्षीय अल्पवयीन मुलीच्या हतबलतेचा गैरफायदा घेत तिला नोकरी आणि राहण्यासाठी खोली (रूम) देण्याचे आमिष दाखवून तिघांनी तिच्यावर सामूहिक अत्याचार केला. याप्रकरणी मानपाडा पोलिसांनी तत्परता दाखवत मुख्य आरोपी चायनीज हॉटेल चालकासह त्याच्या दोन अल्पवयीन साथीदारांना ताब्यात घेतले आहे.

नेमकी घटना कशी घडली? मिळालेल्या माहितीनुसार, पीडित अल्पवयीन मुलगी काही दिवसांपूर्वी घरात वाद झाल्याने राहते घर सोडून निघून गेली होती. कटाई-बदलापूर पाईपलाईन रोडवरील एका चायनीज हॉटेलमध्ये ती अन्नाच्या शोधात गेली असता तिच्याकडे पैसे नव्हते. तिची हतबलता पाहून हॉटेल चालक अंगूर ठाकूर (वय २२) याने तिला मदतीचे आमिष दाखवून विश्वासात घेतले.

त्यानंतर त्याने तिची ओळख परिसरातील अन्य दोन अल्पवयीन मुलांशी करून दिली. मुलीने स्वतःची अडचण सांगताच, या तिघांनी तिला कामाची सोय आणि राहण्यासाठी रूम देण्याचे आमिष दाखवून एका निर्जन ठिकाणी नेले आणि तिच्यावर अत्याचार केला. या क्रूर कृत्यानंतर आरोपी मुलीला सोडून पसार झाले.

सुटका अन् पोलिसांची वेगाने कारवाई: अत्याचारानंतर पीडित मुलगी कशीबशी चालत कुळगाव-बदलापूर पोलीस ठाण्याच्या हद्दीत पोहोचली. तिची दयनीय अवस्था पाहून स्थानिक रहिवाशांनी विचारपूस केली असता हा संतापजनक प्रकार उघडकीस आला. जागृत नागरिकांनी तिला तातडीने पोलिसांच्या स्वाधीन केले.

दरम्यान, मुलीच्या पालकांनी आधीच मानपाडा पोलीस ठाण्यात मुलगी बेपत्ता (अपहरण) झाल्याची तक्रार नोंदवली होती. वरिष्ठ पोलीस निरीक्षक संदीपान शिंदे यांच्या नेतृत्वाखाली तपासाची चक्रे वेगाने फिरवत पोलिसांनी तिन्ही आरोपींना निष्पन्न करून ताब्यात घेतले. मुख्य आरोपी अंगूर ठाकूर याला कल्याण न्यायालयात हजर केले असता न्यायालयाने त्याला पोलीस कोठडी सुनावली आहे, तर इतर दोन आरोपी अल्पवयीन असल्याने त्यांची रवानगी भिवंडी येथील बालसुधारगृहात करण्यात आली आहे.