पुणे: "आमचा ब्रँड मोठा, करायचे ते करा!" रिलायन्स आउटलेटला महागात पडले एक्स्पायर्ड चीज विकणे

पुणे: नामांकित 'रिलायन्स रिटेल' आउटलेटला ग्राहकाच्या तक्रारीवरून ग्राहक आयोगाचा दणका बसला आहे. खराडी येथील रिलायन्स स्मार्ट आउटलेटमधून एक्स्पायरी डेट उलटलेले चीज विकल्याप्रकरणी आणि इतर वस्तूंसाठी छापील किमतीपेक्षा जास्त पैसे उकळल्याप्रकरणी कंपनीला दोषी धरले आहे.

घटनेची पार्श्वभूमी: तक्रारदार बाळासाहेब खोडदे यांच्या मुलांनी रिलायन्स स्मार्ट आउटलेटमधून चीज खरेदी केले होते. घरी आल्यावर हे चीज एक्स्पायर्ड असल्याचे लक्षात आले. याबाबत व्यवस्थापकाकडे तक्रार केली असता, त्यांनी अतिशय उद्दामपणे "आमचा ब्रँड मोठा आहे, तुम्हाला जे करायचे ते करा" असे उत्तर दिले.

 

फसवणूक: चीजशिवाय पनीर आणि शाम्पूच्या बाबतीतही कंपनीने छापील किमतीपेक्षा (MRP) जास्त पैसे उकळले होते.

ग्राहक आयोगाचा निकाल: पुणे जिल्हा ग्राहक तक्रार निवारण आयोगाचे अध्यक्ष अनिल जवळेकर आणि सदस्य शुभांगी दुनाखे यांनी रिलायन्स कंपनीला दोषी ठरवले. कंपनीला तक्रारदाराला १३८ रुपये व्याजासह परत करण्याचे, तसेच मानसिक त्रास व तक्रार खर्चापोटी ३० हजार रुपये भरपाई देण्याचे आदेश दिले.

आयोगाचे कडक ताशेरे: कालमर्यादा संपलेल्या उत्पादनांची विक्री करणे आणि छापील किमतीपेक्षा जास्त रक्कम घेणे, ही अनुचित व्यापार पद्धत असून ग्राहकांच्या जिवाला धोका निर्माण करणारी आहे, असे निरीक्षण आयोगाने नोंदवले.