पुणे: ५ कोटींच्या वेतन घोटाळ्यात सिंहगड इन्स्टिट्यूटच्या संस्थापकासह ७ जणांवर गुन्हा दाखल.

पुणे: शहरातील नामांकित 'सिंहगड टेक्निकल एज्युकेशन सोसायटी' (Sinhgad Institutes) वादाच्या भोवऱ्यात सापडली असून, संस्थेचे संस्थापक मारुती नवले यांच्यासह ७ विश्वस्तांवर पुणे पोलिसांनी गंभीर गुन्हा दाखल केला आहे. २७ शिक्षकांचे तब्बल ५ कोटी ६ लाख रुपयांचे वेतन थकवून त्याचा अपहार केल्याप्रकरणी ही कारवाई करण्यात आली आहे.

काय आहे प्रकरण? एका महिला शिक्षिकेने दिलेल्या तक्रारीनंतर भारती विद्यापीठ पोलीस ठाण्यात हा गुन्हा दाखल करण्यात आला आहे. एप्रिल २०२० पासून ते आजतागायत, संस्थेतील २७ शिक्षक आणि कर्मचाऱ्यांचे वेतन थकवण्यात आले होते. या शिक्षकांना कामावर कायम ठेवूनही त्यांना पगार दिला जात नव्हता किंवा अतिशय अल्प रक्कम दिली जात होती.

वेतन अपहार: एकूण २७ शिक्षकांचे ५ कोटी ६ लाख ८३ हजार ४१८ रुपयांचे वेतन थकवण्यात आले.

धमक्या: वेतन मागणाऱ्या शिक्षकांना नोकरीवरून काढून टाकण्याची धमकी दिली जात होती. तसेच त्यांना जीवे मारण्याच्या धमक्याही देण्यात आल्याचा आरोप फिर्यादीने केला आहे.

फसवणूक: शिक्षकांना वेतन न देता त्यांची आर्थिक फसवणूक केली गेली, तसेच काही बाबतीत चुकीची कागदपत्रे (उदा. फॉर्म-१६) दिल्याचेही समोर आले आहे.

कोणावर गुन्हे दाखल? या प्रकरणात संस्थेचे संस्थापक मारुती नवलेंसह, सचिव सुनंदा नवले, उपाध्यक्ष रचना नवले-अष्टेकर, रोहित नवले यांच्यासह एकूण ७ जणांविरुद्ध भारतीय न्याय संहितेच्या विविध कलमान्वये फसवणूक आणि विश्‍वासघाताचा गुन्हा दाखल झाला आहे. या कारवाईमुळे पुणे शहरासह संपूर्ण महाराष्ट्रातील शैक्षणिक वर्तुळात खळबळ उडाली आहे.

पोलीस आता या प्रकरणाचा अधिक तपास करत असून, संबंधित पदाधिकारी आणि विश्वस्तांना चौकशीसाठी बोलावले जाणार आहे.