12 फेब्रुवारी रोजी भारत बंदची हाक; शाळा,महाविद्यालय आणि सरकारी कार्यालये बंद राहतील की सुरू?

भारत बंदची हाकImage Credit source: टीव्ही ९ नेटवर्क

Bharat Bandh 12 Feb 2026: 12 फेब्रुवारी रोजी देशातील अनेक संघटनांनी भारत बंदचे आवाहन केले आहे. बँक कर्मचारी संगटनांपासून ते शेतकरी संगटनांपर्यंत गुरुवारी देशव्यापी संप पुकारण्यात आला आहे. नवीन कामगार कायदे, भारत-अमेरिका व्यापारी करार, मनरेगाचा बदल, BV-GRG सारख्या मुद्यांवर देशातील कर्मचारी संघटना, शेतकऱ्यांमध्ये मोठी नाराजी आहे. या बंदमुळे बँका, सरकारी कार्यालये, सार्वजनिक वाहतूक क्षेत्र आणि बाजारावर मोठा परिणाम दिसू शकतो. या देशव्यापी संपामुळे काही राज्यात मोठा परिणाम दिसून येऊ शकतो. काही ठिकाणी शाळा आणि महाविद्यालय बंद असू शकतात.

देशव्यापी बंदचे कारण काय?

भारत बंदमध्ये 10 केंद्रीय ट्रेड युनियनचा समावेश आहे. यामध्ये INTUC, AITUC, HMS, CITU, AIUTUC, TUCC, SEWA, AICCTU, LPF आणि UTUC यांचा समावेश आहे. हा संप नवीन लेबर कोड आणि भारत-अमेरिकेतली व्यापारी कराराविरोधात आहे. या नवीन बदलांमुळे देशाच्या कामगार वर्ग, अर्थव्यवस्था आणि सामान्य नागरिकांवर मोठा परिणाम होण्याची शक्यता वर्तवली जात आहे. सरकारच्या नवीन धोरणांचा या संघटनांनी विरोध केला आहे.

या चार नवीन कामगार कायद्यांमुळे कर्मचारी, कामगारांचे अधिकार हिरावल्या जात असल्याचा आरोप या संघटनांनी केला आहे. या कायद्यांमुळे नोकरीची सुरक्षा राहणार नाही. कंपन्यांना कर्मचाऱ्यांना कामावरून कमी करण्याचे अधिक स्वातंत्र्य मिळेल. तर खासगीकरण, किमान वेतन आणि सामाजिक सुरक्षा या मुद्दांवर पण कर्मचारी आणि कामगार नाराज आहेत.

कर्मचारी संघटनांच्या मुख्य मागण्या काय?

चारही कामगार कायदे रद्द करा. प्रस्तावित सीड बिल, विद्युत संशोधन बिल आणि SHANTI कायदा मागे घेण्याची मोठी मागणी कामगार संघटनांनी केली आहे. तर मनरेगा पुन्हा मजबूत करण्याची मागणी करण्यात आली आहे. ‘विकसित भारत-रोजगार आणि उपजीविका हमी योजना (ग्रामीण) अधिनियम 2025’ रद्द करण्याची मागणी कर्मचारी, कामगार संघटनांनी केली आहे.

काय काय बंद असेल, काय असेल सुरू?

देशभरातली शाळा, महाविद्यालये बंद ठेवण्याची अधिकृत आदेश नाहीत. केरळ, कर्नाटक आणि ओडिसा राज्यात या बंदचा प्रभावी परिणाम दिसू शकतो. इथली सार्वजनिक वाहतूक व्यवस्था ठप्प होण्याची शक्यता आहे. त्यामुळे काही शाळा, महाविद्यालये बंद असू शकतात. 12 फेब्रुवारी रोजी सार्वजनिक क्षेत्रातील बँकांचे कामकाज प्रभावित होईल. बँक कर्मचारी आणि अधिकारी संघटनांनी संपात सहभागी होण्याची घोषणा केली आहे. अर्थात बँकांनी अथवा रिझर्व्ह बँकेने या दिवशी सुट्टीची अधिकृत घोषणा केलेली नाही. पण काही बँकांतील कामकाजावर त्याचा थेट परिणाम दिसून येईल.