पुणे खराडीत सिलेंडरचा भीषण स्फोट; फॉर्च्युन सिटी हादरली, एकाची प्रकृती गंभीर

पुणे: खराडी परिसरातील खांदवे नगर येथील 'फॉर्च्युन सिटी' या इमारतीत आज सिलेंडरचा स्फोट होऊन भीषण आग लागल्याची धक्कादायक घटना घडली. ही आग इमारतीच्या पहिल्या मजल्यावरील एका सदनिकेत लागली होती. सिलेंडरच्या स्फोटामुळे परिसरात एकच खळबळ उडाली होती.

घटनेची माहिती मिळताच पुणे महानगरपालिकेच्या अग्निशमन दलाच्या जवानांनी तात्काळ घटनास्थळी धाव घेतली. जवानांनी अत्यंत तत्परतेने कारवाई करत आग आटोक्यात आणली. अग्निशमन दलाच्या या वेगवान हालचालीमुळे आग शेजारच्या घरांमध्ये पसरली नाही आणि एक मोठी दुर्घटना टळली.

या दुर्घटनेत एकूण तीन जण जखमी झाले आहेत. सुदैवाने, अग्निशमन दलाच्या जवानांनी सर्वांना सुरक्षित बाहेर काढले. जखमींपैकी एका व्यक्तीची प्रकृती गंभीर असून, तिघांवरही नजीकच्या रुग्णालयात उपचार सुरू आहेत. सिलेंडर स्फोटाचे नेमके कारण अद्याप स्पष्ट झालेले नाही. स्थानिक पोलीस आणि अग्निशमन विभागाकडून या प्रकरणाचा पुढील तपास सुरू आहे.