नागरी उड्डाण मंत्रालय त्यांनी सांभाळलंय, ते दादांचे मित्र, त्यांनी प्रेझेंटेशन का नाही घेतलं?; रोहित पवार यांचा दोन नेत्यांचं नाव घेत निशाणा

Ajit Pawar Plane Accident : आमदार रोहित पवार यांनी पत्रकार परिषद घेऊन दिवंगत नेते अजित पवार यांच्या विमान अपघाताविषयी खळबळजनक दावे केले आहेत. त्यांनी आजितदादांसोबत 100 टक्के घातपात झालेला असण्याची शक्यता आहे. त्यामुळे त्या अपघाताची चौकशी होणे गरजेचे आहे, अशी मागणी रोहित पवार यांनी केली. अजितदादांसोबत घातपात झालेला आहे, हा दावा करताना त्यांनी काही फोटो दाखवले आहेत. सोबतच काही विमानोड्डाणामधील काही तांत्रिक बाबीही सांगितल्या आहेत. विशेष म्हणजे त्यांनी पत्रकारांच्या प्रश्नाला उत्तर देत अजितदादा यांच्या राष्ट्रवादी पक्षातील वरिष्ठ नेते खासदार सुनील तटकरे तसेच खासदार प्रफुल्ल पटेल यांचे थेट नाव घेत टीका केली आहे.

अनेक लोकांची वेगवेगळी प्रायोरिटी असू शकते

सुनेत्रा पवार यांची इच्छा नसताना त्या उपमुख्यमंत्रिपदाची शपथ कशी घेतील, यासाठी प्रयत्न करण्यात आल्याची शंका रोहित पवार यांनी उपस्थित केली. तसेच सुनील तटकरे आणि प्रफुल्ल पटेल यांच्या खूप ओळखी आहेत. माझ्याऐवजी त्यांनीच अजितदादांच्या अपघाताविषयीचे प्रझेंटेशन द्यायला हवे होते, असे रोहित पवार म्हणाले. आमच्यासाठी अजितदादांसोबत घातपात झाला का? तो दादासोबतच का झाला, याबाबत आमच्या मनात शंका आहे. या प्रश्नांची उत्तरं मिळणं हे आमच्यासाठी महत्त्वाचं आहे. अनेक लोकांची वेगवेगळी प्रायोरिटी असू शकते. तपास ही कदाचित त्यांची प्रायोरिटी नसेल. त्यांच्यासाठी सत्तेत राहणं ही प्रायोरिटी असेल, असा टीकाही रोहित पवार यांनी तटकरे, प्रफुल्ल पटेल यांच्यावर केली.

तटकरे, प्रफुल्ल पटेल यांच्यावर टीका

सत्तेत राहण्यासाठी त्यांनी घाईत शपथविधी घेतला. सुनेत्रा काकींची इच्छा नसताना शपथविधी कसा होईल याचा त्यांनी प्रयत्न केला. त्यांचे इतके कॉन्टॅक्ट आहेत. एव्हिएशन मंत्रालय त्यांनी सांभाळलंय, एमआरए त्यांचं स्वतचं आहे. म्हणजे विमानाचे मेंटेनन्स कसे होते हे त्यांना माहीत आहे. ते दादांचे दोस्त आहेत. दादांसोबत राहिले आहेत. त्यांनी माझ्या जागेवर प्रेझेंटेशन करण्याची गरज होती, असेही रोहित पवार म्हणाले. दरम्यान, आता रोहित पवार यांच्या टीकेवर तटकरे आणि प्रफुल्ल पटेल काय भूमिका घेणार हे पाहणे महत्त्वाचे ठरणार आहे.