Pune : भीमाशंकरला जाणाऱ्या भक्तांसाठी महत्त्वाची सूचना: ३१ मेपर्यंत मंदिर बंद; जिल्हा प्रशासनाचा निर्णय

Pune : भाविकांसाठी महत्त्वाची बातमी समोर आली आहे. नाशिक येथे होणाऱ्या सिंहस्थ कुंभमेळ्याच्या पार्श्वभूमीवर तसेच भाविकांची वाढती गर्दी, सुरक्षिततेचे प्रश्न आणि सुरू असलेली विकासकामे लक्षात घेता श्री क्षेत्र भीमाशंकर मंदिर ३१ मेपर्यंत दर्शनासाठी बंद ठेवण्याचा निर्णय जिल्हा प्रशासनाने घेतला आहे.

यापूर्वी मंदिर ९ एप्रिलपर्यंत बंद ठेवण्यात आले होते; मात्र सुरू असलेल्या कामांना गती देण्यासाठी या मुदतीत वाढ करण्यात आली आहे.

पुढील वर्षी होणाऱ्या कुंभमेळ्याच्या पार्श्वभूमीवर मोठ्या प्रमाणात भाविक भीमाशंकर येथे भेट देण्याची शक्यता लक्षात घेऊन मंदिर परिसरात विविध सुविधा उभारण्याची कामे सुरू आहेत. सध्या जुन्या सभामंडपाचे पूर्णपणे विसर्जन करून नव्या सभामंडपाचे बांधकाम सुरू असून ते सुमारे ७५ टक्के पूर्ण झाले आहे. घुमटाचे कामही प्रगतीपथावर आहे.

याशिवाय, मंदिराकडे जाणाऱ्या पायरीमार्गाचे काम सुरू असून सध्या प्रवेशमार्ग पूर्णपणे बंद आहे. बांधकामासाठी लागणारे मोठे दगड, साहित्य आणि यंत्रसामुग्री परिसरात असल्याने भाविकांच्या सुरक्षिततेच्या दृष्टीने मंदिर खुले ठेवणे धोकादायक असल्याचे प्रशासनाने स्पष्ट केले आहे.

भीमाशंकर परिसर हा अतिवृष्टीचा भाग असल्याने जून ते सप्टेंबर दरम्यान येथे मुसळधार पाऊस पडतो. जूनच्या पहिल्या आठवड्यापासून पावसाला सुरुवात होण्याची शक्यता असल्याने त्यापूर्वी सर्व कामे पूर्ण करण्यावर भर देण्यात आला आहे.

जिल्हाधिकारी जितेंद्र डुडी यांनी सांगितले की, कुंभमेळ्याच्या पार्श्वभूमीवर सुरू असलेली विकासकामे पूर्ण करण्यासाठी मंदिर ३१ मेपर्यंत भाविकांसाठी बंद ठेवण्यात येणार आहे. त्यामुळे भाविकांनी याची नोंद घ्यावी, असे आवाहन प्रशासनाकडून करण्यात आले आहे.