Dahi Handi 2024 : मुंबईत दहीहंडीचा उत्साह, जय जवान पथकाची ९ थरांची सलामी, यंदा विक्रमाच्या तयारीत

Mumbai  : राज्यभरात दहीहंडीचा उत्साह आहे. मुंबईत विविध ठिकाणी दहीहंडी कार्यक्रमांचं आयोजन करण्यात आलं आहे. ठाणे, विक्रोळी, जोगेश्वरी, दादर अशा विविध ठिकाणी गोविंदा पथकं दहीहंडीचे थर लावत सलामी देत आहेत. मुंबईत जय जवान गोविंदा पथक हे अतिशय लोकप्रिय गोविंदा पथक असून या पथकाने विक्रोळीतील कार्यक्रमात नऊ थरांची सलामी दिली आहे. यंदा जय जवान गोविंदा पथ दहा थरांची सलामी देणार असल्याचं बोललं जात आहे. त्यामुळे या पथकाकडे अनेकांच्या नजरा आहेत.

जय जवान गोविंदा पथकाची ९ थरांची सलामी

जय जवान गोविंदा पथकाने मागील अनेक वर्षांपासून आतापर्यंत अनेक बक्षिसं जिंकली आहेत. यंदाच्या दहीहंडी उत्सवात जय जवान पथकाने सर्वात आधी विक्रोळीतील आयोजित कार्यक्रमात ९ थरांची सलामी दिली. त्यानंतर ते १० थर लावणार असल्याचं बोललं जात आहे. हे गोविंदा पथक मुंबईतील विविध ठिकाणी जात एकावर एक मानवी थर रचून सलामी देतात. शेवटच्या थराला या गोविंदा पथकाने चार एक्के लावत सलामी दिली.

Ganpati Special Trains: गणेशोत्सव वाढीव रेल्वेगाड्यांची प्रवाशांना प्रतीक्षा; कोकण रेल्वेचे मात्र 'वेट अ‍ॅंड वॉच'

जय जवान पथकासाठी यंदा ही दहीहंडी खास आहे, कारण या वर्षी त्यांनी पहिल्यांदाच शेवटच्या चार थरांना चार एक्के लावले आहेत. मागील दोन ते तीन महिन्यांपासून हे पथक दहीदंडीचा सराव करत होते. त्यानंतर दहीहंडीच्या दिवशी या पथकाने पहिलीच नऊ थरांची सलामी विक्रोळीतील टागोरनगरमध्ये आयोजित कार्यक्रमात दिली.

दहीहंडीसाठी सर्वत्र उत्साहाचं वातावरण असून गाण्यांच्या तालावर ठेका धरत आनंद व्यक्त केला जात आहे. विक्रोळीतील या आरंभ दहीहंडी कार्यक्रमासाठी आशिष शेलार देखील उपस्थित होते. जय जवान पथकाने नऊ थर लावल्यानंतर या पथकाला बक्षिस देत आशिष शेलार यांनी पथकाचं कौतुक केलं.

दादर येथील आयडियल गल्लीत महिला पथकाने दहीहंडीचे थर लावत सलामी दिली, तर ठाण्यात रणझुंजार गोविंदा पथकाने सलामी दिली. ठाण्यातही दहीहंडीचा उत्साह जोरात आहे. अनेक पथकांनी संकल्प प्रतिष्ठान दहीदंडीमध्ये थर लावत सलामी दिली.