Pune Crime : पुणे रेल्वे स्थानकाच्या आवरातून सात महिन्यांच्या बालकाचे अपहरण

श्रावण अजय तेलंग असे अपहरण झालेल्या बालकाचे नाव आहे. याबाबत त्याचे वडील अजय तेलंग बंडगार्डन पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तेलंग दाम्पत्य मूळचे भुसावळचे आहे. सासूला भेटण्यासाठी तेलंग आणि त्याची पत्नी पुण्यात आले होते. शनिवारी मध्यरात्री पुणे रेल्वे स्थानकाच्या आवारात तेलंग दाम्पत्य झोपले होते. त्यावेळी अनोळखी व्यक्तीने तेलंग यांचा सात महिन्यांचा मुलगा श्रावण याला उचलून नेले. तेलंग दाम्पत्याला जाग आली. तेव्हा श्रावण जागेवर नसल्याचे आढळून आले. तेलंग दाम्पत्याने त्याचा शोध घेतला. तेव्हा तो सापडला नाही.

त्यानंतर घाबरलेल्या तेलंग दाम्पत्याने बंडगार्डन पोलीस ठाण्यात धाव घेऊन तक्रार दिली. वरिष्ठ पोलीस निरीक्षक संदीपान पवार यांनी घटनास्थळी भेट दिली. तातडीने स्टेशन परिसरातील सीसीटीव्ही कॅमेऱ्यांनी केलेले चित्रीकरण तपासासाठी ताब्यात घेण्यात आले. चित्रीकरणात सात महिन्यांच्या श्रावणचे अपहरण करणारी व्यक्ती आढळून आली.

पोलिसांकडून याप्रकरणाचा तपास करण्यात येत आहे. स्टेशन परिसरातील रिक्षाचालक, उपहारगृहचालक, फेरीवाल्यांकडे चौकशी करण्यात आली आहे. अपहृत बालकाची माहिती मिळाल्यास त्वरीत सहायक पोलीस निरीक्षक संदीप मधाळे (मोबाइल क्रमांक- ९४२२४२७८४७), पोलीस शिपाई ज्ञानेश्वर गायकवाड (मोबाइल क्रमांक- ९०११२७०५०५), ज्ञाना बडे (मोबाइल क्रमांक – ९६६५०६३०३३) यांच्याशी संपर्क साधावा, असे आवाहन करण्यात आले आहे.