IPL 2024 RCB vs LSG : तेजतर्रार मयंकची वेगवान गोलंदाजीत ‘यादवी’ ; बंगळूरच्या फलंदाजांना दणका,लखनौचा शानदार विजय

लखनौकडून बंगळूरसमोर १८२ धावांचे आव्हान ठेवण्यात आले. मयंक यादवसह इतर गोलंदाजांनी केलेल्या अचूक टप्प्यातील गोलंदाजीसमोर बंगळूरच्या फलंदाजांचा निभाव लागला नाही. विराट कोहली व फाफ ड्युप्लेसी या जोडीने ४० धावांची भागीदारी करताना सुरुवात छान केली; पण सिद्धार्थच्या गोलंदाजीवर विराट २२ धावांवर बाद झाला. त्यानंतर ड्युप्लेसी १९ धावांवर धावचीत झाला. मयंक यादवच्या जबरदस्त गोलंदाजीपुढे बंगळूरचे फलंदाज अपयशी ठरले. लोमरोर याने ३३ धावांची खेळी केली. त्याला काही यश मिळाले नाही.

बंगळूरचा डाव १५३ धावांवर संपुष्टात आला. दरम्यान, याआधी बंगळूर संघाने नाणेफेक जिंकून प्रथम क्षेत्ररक्षण करण्याचा निर्णय घेतला. क्विंटॉन डी कॉक व के. एल. राहुल या जोडीने आक्रमक सुरुवात करताना ५२ धावांची भागीदारी केली. मॅक्सवेलच्या गोलंदाजीवर राहुल मयंक डागरकरवी २० धावांवर झेलबाद झाला. डी कॉकने मात्र आपला झंझावाती खेळ कायम ठेवला. त्याने ५६ चेंडूंमध्ये ८१ धावांची खेळी साकारताना ८ चौकार व ५ षटकारांचा पाऊस पाडला. निकोलस पूरनने अवघ्या २१ चेंडूंमध्ये नाबाद ४० धावांची फटकेबाजी केली.