Pune : पुणेकरांना दिलासा! रिक्षा-कॅबच्या मनमानीला आळा; मेपासून ‘भारत टॅक्सी’ सेवा निश्चित व परवडणाऱ्या दरात

Pune : टॅक्सी-रिक्षावाल्यांच्या मनमानीला कंटाळलेल्या पुणेकरांसाठी एक आनंदाची बातमी आहे. देशातली पहिली सहकारी टॅक्सी सेवा आता पुण्यात सुरू होणार आहे. मे महिन्यापर्यंत पुण्यात भारत टॅक्सी धावणार अशी माहिती पुणे आरटीओने दिली आहे. यामुळे पुणेकरांना ओला, उबरऐवजी एक स्वस्त पर्याय उपलब्ध होणार आहे.

चालकांनाही मोठा फायदा
केंद्र सरकारकडून या वर्षीच भारत टॅक्सी सेवा सुरू करण्यात आली आहे. या सेवेमुळे फक्त प्रवाशांनाच फायदा होणार नसून टॅक्सी चालकांनाही जास्तीत-जास्त परतावा मिळणार आहे. सध्या ही सेवा गुजरात आणि दिल्लीमध्ये सुरू आहे. आता पुण्यातही या सेवेचा विस्तार होणार आहे. ओला-उबरमध्ये कंपनीला उत्तर द्यावे लागत असून भारत ट्रक्सी सेवेमध्ये चालक स्वतः मालक असतील. हा अॅप सहकारी मॉडेलवर आधारित असून मिळणाऱ्या परताव्यापैकी 80 टक्के पैसे टॅक्सी चालकांना देण्यात येणार आहे अशी माहिती पुण्याच्या आरटीओ अधिकाऱ्याने दिली आहे.

इतर कंपन्यांसह करु शकतात काम
दरम्यान, उबर, ओला किंवा रॅपिडोसोबत काम करणारे टॅक्सी चालकही भारत टॅक्सी सेवेचा लाभ घेऊ शकतात. ही सेवा संपूर्णपणे सहकारी असून वाहनचालकांवर बंधनं नसतील अशीही माहिती देण्यात आली आहे. आरटीओमधील अधिकारी स्वप्निल भोसले यांनी पुण्यात तातडीने भारत टॅक्सी सुरू करण्यासाठी पत्र लिहिलं होतं. सध्या कॅब आणि टॅक्सी चालकांसोबत याबाबत चर्चा सुरू आहे. सरकारने मंजूर केलेल्या दरांनुसार भाडे ठरवण्यावर सध्या चर्चा सुरू असून प्रस्ताव पाहून टॅक्सी चालक अंतिम निर्णय घेतील.

स्वस्त आणि निश्चित भाडं
पुण्यात रिक्षा चालक मीटरपेक्षा अधिक भाडे घेत असून नागरिकांची लूट सुरू असल्यामुळे संताप व्यक्त केला जात आहे. गुजरात आणि दिल्लीमध्ये भारत टॅक्सी ओला, उबर या अॅपपेक्षा 30 टक्के स्वस्त भाडे घेतात हे स्पष्ट झालं आहे. शिवाय भारत टॅक्सीमध्ये सर्ज प्राईझिंग नसल्यामुळे कोंडीच्या काळात भाडे वाढण्याची चिंताही नाही. त्यामुळे भाडे निश्चित राहून प्रवाशांना स्वस्तात प्रवास करता येणार आहे.

यासह रात्रीच्या वेळीसुद्धा भाडे वाढणार नसून प्रवाशांना प्रत्येकवेळी स्वस्त दरात प्रवास करता येणार आहे. त्यात भाडे पूर्वीच स्पष्ट झाल्यामुळे पारदर्शकता वाढून प्रवासी भारत टॅक्सीला पसंती देतील अशी आशा व्यक्त केली जात आहे.