Pimpri Chinchwad Fire : आगीच्या भयंकर घटनेनं पिंपरी-चिंचवड हादरलं; स्फोटांच्या आवाजाने नागरिकांची झोप उडाली

Pimpri Chinchwad Fire : पिंपरी चिंचवड शहरातील ताथवडे परिसरात पुणे-बँगलोर महामार्गावर रविवारी रात्री एका टँकरला भीषण आग लागली. प्रोपिलीन गॅस भरलेल्या या टँकरला आग लागली. आगीने रौद्र रुप धारण केल्यानंतर गॅसने भरलेल्या सिलिंडरचेही स्फोट झाले. त्यामुळे रात्रभर नागरिकांमध्ये दहशतीचं वातावरण होतं.

घटनेची माहिती मिळताच वाकड, हिंजवडी, रावेत परिसरात गस्त घालणारे अधिकारी घटनास्थळी दाखल झाले. काही वेळातच अग्निशमन दलाच्या गाड्या देखील घटनास्थळी दाखल झाल्या आणि आग पूर्णपणे नियंत्रणात आणली.  

प्राथमिक माहितीनुसार, ताथवडे परिसरातील जेएसपीएम महाविद्यालयाजवळ मे. तिरूपती करियरचे 21 टन क्षमतेच्या प्रोपिलीन गॅसची अवैधरित्या भरणा घरगुती 14.2kg आणि कमर्शियल सिलेंडरमध्ये करण्यात येत होता.

यामध्ये गॅसची गळती झाल्यानंतर आग लागली असावी. त्यानंतर भीतीपोटी कार्यरत कर्मचारी घटनास्थळावरुन पळून गेले असावे. या घटनेत कुणीही जखमी झाल्याची माहिती नाही.