Accident News : अमित शाहांच्या कार्यक्रमाहून परतणाऱ्या तीन बसला भीषण अपघात, आठ जणांचा मृत्यू तर 50 जखमी

मध्यप्रदेशातून भीषण अपघाची बातमी समोर आली आहे. भरधाव ट्रकने तीन बसला टक्कर दिल्यामुळे मोठी दुर्घटना घडली. या अपघातामध्ये आठ जणांचा दुर्दैवी मृत्यू झाला असून यामध्ये 50 जण जखमी झाले आहेत. मध्य प्रदेशातील सिधी जिल्ह्यात काल (शुक्रवारी 24 फेब्रुवारी) भीषण अपघात झाला आहे.

एका भरधाव ट्रकने तीन बसला मागून धडक दिली. या अपघाताची पोलिसांनी माहिती देताना सांगितलं की, या अपघातात आठ जणांचा मृत्यू झाला असून 50 जण जखमी झाले असून त्यापैकी 15-20 जणांची प्रकृती चिंताजनक आहे.

मध्य प्रदेशमधील रीवा आणि सिधी जिल्ह्याच्या सीमेवर हा भीषण अपघात झाला. काल रात्री नऊ वाजण्याच्या सुमारास ही दुर्घटना घडली. ट्रकने तीन बसला धडक दिली. या अपघातामध्ये आठ जणांचा मृत्यू झाला तर 50 जण जखमी झाले. जखमींवर रीवा आणि सिद्धी येथील रुग्णालयामध्ये उपचार सुरु आहेत.

समोर आलेल्या माहितीनुसार, सतना येथे आयोजित कोल महाकुंभातील केंद्रीय गृहमंत्री अमित शाह यांच्या कार्यक्रमानंतर या बसेस परतत होत्या. केंद्रीय गृहमंत्री अमित शाह यांच्या रॅलीनंतर लोक बसमध्ये चढत होते. अपघाताच्या वेळी बस रस्त्याच्या कडेला उभ्या होत्या. ट्रकचा टायर फुटल्यामुळे हा अपघात झाल्याची माहिती समोर आली आहे. केंद्रीय गृहमंत्री अमित शाह आणि मध्य प्रदेशचे मुख्यमंत्री शिवराज सिंह चौहान यांनीही या अपघातानंतर शोक व्यक्त केला आहे.

मुख्यमंत्री शिवराज सिंह चौहान यांनी काल रात्री (शुक्रवारी) रात्री उशिरा रेवा येथील संजय गांधी मेमोरियल हॉस्पिटलला भेट दिली आहे. मुख्यमंत्री शिवराज सिंह चौहान यांनी जखमींची भेट घेऊन कुटुंबीयांचे सांत्वन केले आहे.