Maghi Yatra In Pandharpur : माघी यात्रेसाठी पंढरपुर सज्ज; विठ्ठल मंदिर सजले, पाेलिस यंत्रणा सतर्क

Maghi Yatra In Pandharpur : माघी यात्रा कालावधीत भाविकांच्या सुरक्षेसाठी पंढरपुरात पोलीस यंत्रणा सज्ज झाली आहे. यात्रा काळात विविध ठिकाणी एक हजार 550 पोलीस अधिकारी व कर्मचारी, एक एसआरपीएफ तुकडी असा बंदोबस्त असणार आहे. दरम्यान माघी यात्रेच्या निमित्ताने पंढरपूर येथील  विठ्ठल रुक्मिणी मंदिरावर  विद्युत दिव्यांची आकर्षक रोषणाई करण्यात आली आहे. दिव्यांच्या प्रकाशाने मंदिर व परिसर उजळून निघाला आहे. 

माघ शुद्ध एकादशी एक फेब्रुवारीला आहे. या माघी यात्रा कालावधीत श्री विठ्ठल-रुक्मिणीमातेच्या दर्शनासाठी पंढरपुरात भाविक मोठ्या प्रमाणात येतात. वारीत येणाऱ्या भाविकांच्या व स्थानिक नागरिकांच्या सुरक्षेसाठी तसेच वारी सुरक्षितपणे पार पडण्यासाठी पोलीस यंत्रणा सज्ज झाली आहे.

सुरक्षेसाठी व वाहतुक नियत्रंणासाठी 1 हजार 550 पोलीस अधिकारी व कर्मचारी यांची नेमणूक करण्यात आली आहे. यामध्ये 02 पोलीस उपअधिक्षक, 21 पोलीस निरिक्षिक, 69 सहाय्यक पोलीस निरिक्षक व पोलीस उपनिरिक्षक, 713 पोलीस कर्मचारी व 700 होमगार्ड तसेच 01 एसआरपीएफ कंपनीच्या तुकडी तर एक शिघ्र कृती दल पथक नियुक्त करण्यात आले आहेत.