पुणे: जे. एम. रोड खाऊ गल्लीत 'एफडीए'चा धडक कारवाईचा दणका; १७ पैकी ८ आस्थापने बंद, ६ परवाने निलंबित

पुणे: नागरिकांना सुरक्षित, स्वच्छ आणि दर्जेदार खाद्यपदार्थ मिळावेत, या उद्देशाने अन्न व औषध प्रशासनाने (एफडीए) पुण्यातील शिवाजीनगर येथील प्रसिद्ध जे. एम. रोड खाऊ गल्लीत मोठी धडक कारवाई केली आहे. या विशेष तपासणी मोहिमेत एकूण १७ खाद्य आस्थापनांची तपासणी करण्यात आली. त्यामध्ये वैध नोंदणी किंवा परवान्याशिवाय व्यवसाय करणाऱ्या आणि अस्वच्छतेचे नियम मोडणाऱ्या आठ आस्थापनांना व्यवसाय बंद करण्याच्या नोटिसा बजावण्यात आल्या आहेत, तर सहा आस्थापनांचे परवाने तात्काळ निलंबित करण्यात आले आहेत. तसेच विना नोंदणी व्यवसाय करणाऱ्या आठ व्यावसायिकांना प्रत्येकी ३० हजार रुपयांप्रमाणे एकूण दोन लाख ४० हजार रुपयांचा दंड ठोठावण्यात आला आहे.

अन्न व औषध प्रशासनाच्या पुणे विभागातील झोन दोनच्या पथकाने १८ नोव्हेंबर २०२६ रोजी जे. एम. रोड खाऊ गल्ली, जंगली महाराज मंदिरासमोरील परिसर आणि एन. सी. आर. हॉटेल परिसरात ही विशेष मोहीम राबवली. अन्न सुरक्षा व मानके कायद्यातील विविध तरतुदींचे उल्लंघन करणाऱ्या व्यावसायिकांवर ही कठोर कारवाई करण्यात आली.

विना नोंदणी व्यवसाय; आठ ठिकाणी टाळे वैध अन्न परवाना किंवा नोंदणी नसताना व्यवसाय चालवणाऱ्या श्रीनाथ पिझ्झा अँड सँडविचेस, राज चायनीज फास्ट फूड, हिंदवी स्वराज्य, एव्हरेस्ट मोमोज, जय मल्हार भुर्जी सेंटर, शोरमा सेंटर, उत्कर्ष मंडळ लव्ह ज्यूस पॉईंट आणि साई ज्यूस, मिल्कशेक अँड सरबत सेंटर या आठ आस्थापनांना व्यवसाय बंद करण्याच्या नोटिसा देण्यात आल्या. या सर्व आठ व्यावसायिकांवर प्रत्येकी ३० हजार रुपयांप्रमाणे एकूण २.४० लाख रुपयांचा दंड आकारण्यात आला आहे.

अस्वच्छतेचा ठपका; सहा परवाने निलंबित स्वच्छतेच्या नियमांचे उल्लंघन केल्याप्रकरणी सुमित कुमार, जे. एम. वडापाव स्नॅक्स, हॅप्पी फॅमिली रेस्टॉरंट, श्री सद्गुरू हिंदवी स्वराज्य स्पेशल तुपातील साबुदाणा वडे, जे. एम. पावभाजी कॉर्नर आणि श्री कृष्णा दिल्ली चाट अँड पाणीपुरी सेंटर या सहा आस्थापनांचे परवाने तात्काळ निलंबित करण्यात आले आहेत. याशिवाय, हॅप्पी फॅमिली चिकन शोरमा रोल हाऊस आणि पार्थ अंडा भुर्जी सेंटर या आस्थापनांना सुधारणा नोटिसा बजावण्यात आल्या आहेत.

तपासणीत उघड झालेल्या गंभीर त्रुटी तपासणीदरम्यान अनेक गंभीर त्रुटी समोर आल्या. तयार अन्नपदार्थ उघड्यावर ठेवणे, तळण्यासाठी एकाच तेलाचा वारंवार वापर करणे, चटण्या आणि सॉस अस्वच्छ स्थितीत साठवणे तसेच खाद्यपदार्थांवर तयार केल्याची आणि मुदत संपण्याची (expiry/best before) तारीख नसणे अशा बाबी आढळल्या. कामगारांचे ॲप्रन आणि हातमोजे अस्वच्छ होते. तसेच कामगारांची वैद्यकीय तपासणी प्रमाणपत्रे, पाणी व अन्न तपासणी अहवाल आणि कच्च्या मालाच्या खरेदीच्या नोंदीही उपलब्ध नव्हत्या. अन्न तयार करण्याच्या जागेजवळ उघड्या कचराकुंड्या, अस्वच्छ फरशी आणि सांडपाण्याच्या निचऱ्याची अपुरी व्यवस्था आढळून आली.

सह आयुक्त (अन्न) एस. आर. करकले आणि सहाय्यक आयुक्त एस. आय. हाश्मी यांच्या मार्गदर्शनाखाली अन्न सुरक्षा अधिकारी पी. डी. मगर, एस. आर. घोडके, आर. मते, एम. आर. बटुले आणि ए. एस. उमाप यांच्या पथकाने ही कारवाई केली. आवश्यक सर्व नियमांची पूर्तता केल्याशिवाय कोणत्याही व्यवसायिकाने व्यवसाय पुन्हा सुरू करू नये, असा स्पष्ट इशारा प्रशासनाने दिला आहे.



शहर

महाराष्ट्र

गुन्हा

राजकीय

विडियो गॅलेरी

Leave a Reply

Your email address will not be published. Required fields are marked *