माझा भाऊ गेला, त्याच दिवशी विलिनीकरणाच्या चर्चेला फुल स्टॉप लागला"; राष्ट्रवादीच्या एकत्रिकरणावर खासदार सुप्रिया सुळे यांचे स्पष्ट आणि भावूक विधान!

राजकीय वर्तुळात गेल्या काही दिवसांपासून राष्ट्रवादी काँग्रेस पक्षाच्या दोन्ही फुटीर गटांच्या एकत्रिकरणाबाबत (NCP Merger) आणि विलिनीकरणाबाबत विविध तर्क-वितर्क व चर्चांना उधाण आले होते. या सर्व चर्चांवर आता शरदचंद्र पवार राष्ट्रवादी पक्षाच्या नेत्या तथा लोकसभा खासदार सुप्रिया सुळे (Supriya Sule) यांनी प्रसारमाध्यमांशी संवाद साधताना अत्यंत स्पष्ट, रोखठोक आणि भावूक भूमिका मांडली आहे.

पत्रकारांशी बोलताना खासदार सुप्रिया सुळे यांनी सांगितले की, "माझा भाऊ (अजित पवार) जिथे होता, तोपर्यंत दोन्ही गटांच्या विलिनीकरणाच्या चर्चा सुरू होत्या आणि त्यासाठी एक निश्चित तारीखही ठरवण्यात आली होती. मात्र, ज्या दिवशी माझा भाऊ गेला (निधन झाले), त्याच दिवशी विलिनीकरणाच्या या सर्व चर्चांना कायमचा 'फुल स्टॉप' लागला आहे."

भावाच्या निधनानंतर या विषयावर कोणतीही चर्चा नाही:

सुप्रिया सुळे यांनी पुढे स्पष्ट केले की, दादांच्या निधनानंतर आमच्या पक्षाकडून किंवा आमच्या बाजूने या विषयावर एकही अधिकृत विधान करण्यात आलेले नाही. आमचे पक्षाचे प्रवक्ते किंवा इतर कोणतेही नेते यावर बोललेले नाहीत. भाऊ हयात असताना त्यांच्यासोबत विलिनीकरणाबाबत चर्चा झाली होती आणि काय करायचे हे ठरले होते, मात्र आता भाऊच राहिला नाही, त्यामुळे आमच्यासाठी तो विषय त्याच दिवशी संपला आहे. त्यामुळे या विषयावर वारंवार प्रश्न विचारू नका आणि यात कोणतीही घाई करू नका, अशी हात जोडून विनंतीही त्यांनी पत्रकारांना केली.

तसेच, राजकीय घडामोडींवर दररोज वेगवेगळे तर्क-वितर्क लावले जातात, परंतु आमचे राजकारण हे नेहमीप्रमाणे संविधानाच्या चौकटीत राहूनच सुरू आहे, असे त्यांनी नमूद केले. अजित पवार गटाकडून विलिनीकरणाबाबत सध्या जे काही दावे किंवा विधानं केली जात आहेत, त्यावर आम्हाला काहीही बोलत नाही, असे सांगत त्यांनी या प्रकरणावर अधिक भाष्य करणे टाळले.

देशापुढील प्रश्न आणि जनतेच्या समस्यांवर भर:

सध्या देशासमोर महागाईचे मोठे संकट आणि अनेक गंभीर आव्हाने उभी आहेत. आंतरराष्ट्रीय स्तरावर विशेषतः अमेरिकेत झालेल्या सत्ता बदलांचे आणि धोरणात्मक बदलांचे परिणाम भारतावर होऊ शकतात. संसदेत आणि केंद्र सरकारकडून अनेक महत्त्वाची विधेयके आणली जात आहेत. या संपूर्ण प्रक्रियेमध्ये देशातील सर्व राजकीय पक्ष सहभागी आहेत, त्यामुळे देशाच्या विकासाचे धोरण ठरवताना आणि जनहिताचे प्रश्न सोडवताना अनावश्यक राजकीय चर्चांपेक्षा मूळ मुद्द्यांवर लक्ष केंद्रित करणे गरजेचे आहे, असे मतही सुप्रिया सुळे यांनी या प्रसंगी व्यक्त केले.