Maharashtra Budget Session 2026 : उद्यापासून राज्याचे अर्थसंकल्पीय अधिवेशन; आज संध्याकाळी राज्यमंत्रिमंडळाची बैठक

राज्याच्या राजकारणातील अत्यंत महत्त्वाचे मानले जाणारे अर्थसंकल्पीय अधिवेशन उद्यापासून सुरू होत आहे. आगामी चार आठवडे राज्याची विधानसभा आणि विधान परिषद या अधिवेशनामुळे गाजणार आहे. अधिवेशनाच्या पूर्वसंध्येला आज सायंकाळी ५ वाजता राज्य मंत्रिमंडळाची बैठक बोलावण्यात आली आहे. यामध्ये आगामी दिवसांतील रणनीतीवर चर्चा होण्याची शक्यता आहे. या बैठकीनंतर महायुतीची संयुक्त पत्रकार परिषद पार पडेल. ज्यामध्ये विरोधकांच्या आरोपांना प्रत्युत्तर दिले जाईल. यंदा शुक्रवार ६ मार्च रोजी दुपारी २ वाजता राज्याचा अर्थसंकल्प सादर होणार आहे. मुख्यमंत्री देवेंद्र फडणवीस हे हा अर्थसंकल्प सादर करणार आहेत. मुख्यमंत्री म्हणून राज्याचा अर्थसंकल्प सादर करण्याची ही त्यांची पहिलीच वेळ आहे, तर विधान परिषदेत वित्त राज्यमंत्री आशीष जयस्वाल अर्थसंकल्प मांडतील. यापूर्वी फडणवीसांनी २०२३-२४ चा अर्थसंकल्प वित्तमंत्री म्हणून मांडला होता. त्यामुळे आता संपूर्ण महाराष्ट्राचे लक्ष अर्थसंकल्पीय अधिवेशनाकडे लागून राहिले आहे. यासह देश-विदेश, महाराष्ट्र, क्रीडा, मनोरंजन क्षेत्रातील बातम्या वाचण्यासाठी दिवसभर हा ब्लॉग फॉलो करा.