छत्रपती संभाजीनगर: पैशांच्या वादातून आईची कारमध्ये गळा आवळून हत्या, १४ महिन्यांच्या बालकाला नदीत फेकले

छत्रपती संभाजीनगर: जिल्ह्यातील वाळूज एमआयडीसी परिसरातून १ एप्रिल २०२६ रोजी बेपत्ता झालेल्या २६ वर्षीय सायमा सलमान चौधरी आणि तिच्या १४ महिन्यांच्या चिमुकल्या मुलाची अत्यंत अमानुषपणे हत्या करण्यात आल्याची धक्कादायक घटना उघडकीस आली आहे. पैशांच्या आर्थिक व्यवहारातून हे दुहेरी हत्याकांड घडवून आणल्याचा गंभीर आरोप असून, या प्रकरणी दोघांविरुद्ध गुन्हा दाखल करण्यात आला आहे.

नेमके काय घडले?
सायमा चौधरी हिचा विवाह २०२० मध्ये सलमान अब्दुल सलमान चौधरी याच्याशी झाला होता. पती पुण्यात नोकरीला असल्याने सायमा आपला मुलगा साजीम याच्यासह साजापूर येथे आई-वडिलांकडे राहत होती. १ एप्रिल २०२६ रोजी ती मुलाला घेऊन घरातून बाहेर पडली, ती पतीकडे गेली असावी असा कुटुंबाचा समज होता. मात्र, दीड महिना उलटूनही ती पतीकडे न पोहोचल्याने १९ मे रोजी वाळूज पोलीस ठाण्यात ती बेपत्ता असल्याची तक्रार दाखल करण्यात आली.

हत्येचा उलगडा:
तपासादरम्यान, नाशिक जिल्ह्यातील वावी पोलीस ठाण्याच्या हद्दीतील कणकोरी शिवारातील एका विहिरीत ६ एप्रिल रोजी एका अज्ञात महिलेचा कुजलेला मृतदेह सापडल्याची माहिती समोर आली. मृतदेहावरील कपडे आणि दागिने यांच्या आधारे फिर्यादी अब्दुल लतीफ यांनी तो मृतदेह आपली मुलगी सायमा हिचाच असल्याचे ओळखले.

 

हत्येचे कारण:
पोलिसांच्या तपासात आर्थिक वादातून हे हत्याकांड घडल्याचे निष्पन्न झाले. सायमाने आरोपींच्या बँक खात्यात ३ लाख रुपये जमा केले होते आणि ५० हजार रुपयांचे व्यवहार फोन-पेद्वारे केले होते. आरोपींनी तिला पैशांच्या व्यवहारासाठी वाळूज परिसरात बोलावले होते. कारमधून प्रवासादरम्यान आरोपींनी सायमाचा ओढणीने गळा आवळून खून केला आणि मृतदेह विहिरीत टाकला. क्रूरतेचा कळस म्हणजे, त्यांनी सायमाच्या १४ महिन्यांच्या चिमुकल्या मुलालाही वाहत्या नदी-नाल्यात फेकून देऊन त्याची निर्घृण हत्या केली.

पुढील कार्यवाही:
या प्रकरणी नुरजमा अहमद चौधरी आणि सद्दाम उर्फ आमीर अहमद चौधरी यांच्याविरुद्ध खुनाचा गुन्हा दाखल करण्यात आला असून, पुढील तपास नाशिक पोलिसांकडे सोपवण्यात आला आहे.