विकेंडचा आनंद ठरला जीवघेणा; पवना आणि इंद्रायणी नदीपात्रात वेगवेगळ्या ठिकाणी ३ तरुणांचा बुडून दुर्दैवी अंत!

पुणे: मावळ आणि पिंपरी-चिंचवड परिसरात विकेंडला पर्यटनाचा आनंद घेण्यासाठी गेलेल्या तीन वेगवेगळ्या तरुणांना पाण्यात बुडून आपला जीव गमवावा लागल्याची काळीज हेलावून टाकणारी घटना समोर आली आहे. शनिवार आणि रविवार अशा दोन दिवसांत पवना आणि इंद्रायणी नदीच्या वेगवेगळ्या पात्रांमध्ये या दुर्घटना घडल्या. यामुळे मृतांच्या कुटुंबियांवर दुःखाचा डोंगर कोसळला असून संपूर्ण मावळ तालुक्यात मोठी हळहळ व्यक्त केली जात आहे.

तीन वेगवेगळ्या ठिकाणी घडल्या दुर्घटना:

• पहिली घटना (बेबडओहळ - पवना नदी): शिरगाव-परंदवडी पोलीस ठाण्याच्या हद्दीतील बेबडओहळ परिसरातील पुलाजवळ तीन मित्र फिरण्यासाठी आले होते. नदी पात्रात उतरल्यानंतर पाण्याचा अंदाज न आल्याने ते वाहून जाऊ लागले. स्थानिक नागरिक आणि रेस्क्यू टीमने तात्काळ धाव घेत दीपक कुमार आणि रमाकांत दारवा या दोघांना सुरक्षित बाहेर काढले, मात्र अरमान कुंभार (वय २१, रा. पिंपरी-चिंचवड, मूळ रा. झारखंड) हा पाण्याच्या तीव्र प्रवाहामुळे वाहून गेला. 'वन्यजीव रक्षक मावळ' टीमने शोधमोहीम राबवून रविवारी सकाळी त्याचा मृतदेह बाहेर काढला.

• दुसरी घटना (कुंडमळा - इंद्रायणी नदी): तळेगाव एमआयडीसी पोलीस ठाण्याच्या हद्दीतील प्रसिद्ध पर्यटनस्थळ कुंडमळा येथे भोसरी येथील बालाजीनगर परिसरातील तीन मित्र आले होते. येथील इंद्रायणी नदीच्या पात्रात पोहण्यासाठी उतरलेला निखिल कुशबा कानडे (वय २१, रा. भोसरी) हा तरुण पाण्याच्या खोलीचा अंदाज न आल्याने बुडाला. रेस्क्यू टीमने त्याला बाहेर काढून रुग्णालयात दाखल केले, परंतु डॉक्टरांनी त्याला मृत घोषित केले.

• तिसरी घटना (देहू - इंद्रायणी नदी): देहूरोड पोलीस ठाण्याच्या हद्दीतील संत तुकाराम महाराज देहू येथील गाथा मंदिराजवळील चार पूल परिसरातील इंद्रायणी नदीच्या डोहात एक ४० ते ४५ वर्षीय अज्ञात इसम बुडाल्याची घटना घडली. रविवारी त्याचा मृतदेह नदीपात्रातून बाहेर काढण्यात आला असून देहू पोलीस त्याची ओळख पटवण्याचा प्रयत्न करत आहेत.

प्रशासनाचे नागरिकांना आवाहन:उन्हाळ्याच्या सुट्ट्या आणि शनिवार-रविवारच्या सुट्ट्यांमुळे धरण, नदी आणि प्रसिद्ध कुंडांच्या ठिकाणी पर्यटकांची मोठी गर्दी होत आहे. अनेकदा पाण्याचा वेग, खोली आणि डोहांच्या धोकादायक रचनेचा अंदाज येत नसल्याने क्षणिक आनंदासाठी केलेले धाडस जीवघेणे ठरत आहे. नदी किंवा धरण परिसरात उतरताना पर्यटकांनी काळजी घ्यावी आणि प्रशासनाने दिलेल्या सुरक्षा सूचनांचे पालन करावे, असे आवाहन वन्यजीव रक्षक मावळ संस्था आणि स्थानिक पोलिसांनी केले आहे.