Vasant More : वसंत मोरेंचं ठरलं? शरद पवार गटाच्या पक्ष कार्यालयात पोहोचले, प्रतिक्रियाही दिली

यावेळी पत्रकारांशी वसंत मोरे  यांनी संवाद साधला. तुर्तास आपण पक्ष प्रवेश करत नसून ही फक्त सदिच्छा भेट असल्याचं मोरे म्हणालेत. यामुळे त्यांची काय भूमिका आहे ही त्यांनी गुलदस्तात ठेवलीय. मिळालेल्या माहितीनुसार , वसंत मोरे हे शरद पवार यांची भेट घेतील त्यानंतर चर्चा होईल त्यानंतरच मोरे आपली भूमिका स्पष्ट करतील. 'मला साहेबांनी भेटायला बोलवलं होतं, त्यामुळे मी आलो. सध्या निवडणुका आहेत मी खासदारकीसाठी इच्छुक आहे. परंतु आज माझा पक्षप्रवेश नाहीये. आज मी फक्त शरद पवार यांची भेट घेण्यासाठी आलोय'.

वसंत मोरे यांची ओळख कट्टर मनसैनिक म्हणून होती. परंतु बऱ्याच दिवसांपासून ते पक्षात नाराज होते. याच नाराजीतून त्यांनी राज ठाकरे यांची साथ सोडत पक्षाला रामराम ठोकला. वसंत मोरे हे शरद पवार गटात प्रवेश करणार असल्याचं म्हटलं जात आहे. काही दिवसांपूर्वी त्यांनी शरद पवार यांची भेट घेतली होती. आज पुन्हा त्यांनी शरद पवार गटाच्या पक्ष कार्यालयात भेट दिली. यावेळी पत्रकारांशी वसंत मोरे यांनी संवाद साधला.