Uddhav Thackeray : आमचं सरकार सत्तेत येतंय, तुम्हाला मोठं मंत्रीपद देऊ; उद्धव ठाकरेंची नितीन गडकरींना पुन्हा ऑफर

लोकसभा निवडणुकीच्या पार्श्वभूमीवर उद्धव ठाकरे मैदानात उतरले असून राज्यात ठिकठिकाणी वादळी सभा घेत आहेत. भाजपला महाराष्ट्रातून हद्दपार करून महाविकास आघाडीच्या उमेदवारांना निवडून आणा, असं आवाहन उद्धव ठाकरे  मतदारांसह शिवसैनिकांना करत आहे.

उद्धव ठाकरेंची गडकरींना पुन्हा ऑफर

पुसद येथील जाहीर सभेत शिवसैनिकांना संबोधित करताना उद्धव ठाकरे म्हणाले, "नितीन गडकरी हे तत्कालिन युती सरकारमधील धाडसी मंत्री होते. त्यांचा वेगळाच रुबाब होता. गडकरींनी मुंबई-पुणे द्रुतगती महामार्गाचं काम विक्रमी वेळेत पूर्ण करून हिंदुहृदयसम्राट बाळासाहेब ठाकरे यांचं स्वप्न पूर्ण केलं".  

"नितीन गडकरी  यांच्याबद्दल आम्हाला नक्कीच अभिमान आहे. पण गेल्या आठवड्यात भाजपने लोकसभेच्या १९५ उमेदवारांची यादी जाहीर केली. या यादीत मोदी अमित शहा यांची नावे आहेत. इतकंच नाही, तर कृपाशंकर सिंह यांच्यासारख्या माणसाचे नाव आहे. पण गडकरींचं नाव नाही. भाजप त्यांना उमेदवारी देणार की नाही, याबाबत मला कल्पना नाही".