सातारा: जेजुरीला निघालेल्या भाविकांच्या टेम्पो ट्रॅव्हलरचा उभ्या ट्रकला धडक; आजोबा-नातीचा जागीच मृत्यू.

सातारा: जेजुरीला निघालेल्या भाविकांवर काळाचा घाला; टेम्पो ट्रॅव्हलरच्या अपघातात आजोबा-नातीचा मृत्यू, ५ जण गंभीरकोल्हापूरवरून जेजुरीला दर्शनासाठी निघालेल्या भाविकांच्या टेम्पो ट्रॅव्हलरचा साताऱ्याजवळ भीषण अपघात झाला आहे. पुणे-बंगळुरू महामार्गावरील म्हसवे (ता. सातारा) हद्दीत रविवारी पहाटेच्या सुमारास उभ्या असलेल्या ट्रकला टेम्पो ट्रॅव्हलरने जोरदार धडक दिल्याने ही दुर्घटना घडली. या अपघातात एका ७५ वर्षीय आजोबांचा आणि १६ वर्षीय नातीचा दुर्दैवी मृत्यू झाला
असून, अन्य पाच जण गंभीर जखमी झाले आहेत.

नेमकी घटना काय? मिळालेल्या माहितीनुसार, कोल्हापूर जिल्ह्यातील कसबा आरळे (ता. करवीर) येथील काही भाविक टेम्पो ट्रॅव्हलरमधून जेजुरीला दर्शनासाठी निघाले होते. रविवारी पहाटे ४:३० च्या सुमारास सातारा परिसरातील डी-मार्ट समोरील महामार्गावरून जात असताना, चालकाचे वाहनावरील नियंत्रण सुटले आणि टेम्पो ट्रॅव्हलर रस्त्याच्या कडेला उभ्या असलेल्या ट्रकला जाऊन आदळली.धडक इतकी भीषण होती की टेम्पो ट्रॅव्हलरच्या पुढील भागाचा अक्षरश: चेंदामेंदा झाला. मृत आणि जखमींची ओळखया दुर्घटनेत एकनाथ (बापू) कांबळे (वय ७५) आणि स्नेहल उत्तम कांबळे (वय १६) यांचा जागीच मृत्यू झाला. अपघाताच्या वेळी वाहनातील बहुतांश प्रवासी गाढ झोपेत होते, त्यामुळे त्यांना गंभीर दुखापत झाली आहे. उत्तम कांबळे, अमित कांबळे, मधुकर कांबळे, आशा कांबळे आणि दीपक कांबळे असे ५ जण गंभीर जखमी झाले असून, त्यांच्यावर रुग्णालयात उपचार सुरू आहेत.

 

यापैकी काहींची प्रकृती चिंताजनक असल्याचे समजते. पोलिसांचा तपास सुरूअपघाताची माहिती मिळताच स्थानिकांनी आणि शिवेंद्रसिंहराजे रेस्क्यू टीमच्या कार्यकर्त्यांनी घटनास्थळी धाव घेत जखमींना तातडीने रुग्णालयात हलवले. सातारा तालुका पोलिसांनी घटनास्थळी पोहोचून पंचनामा केला असून, ट्रक चालकाने पार्किंग लाईट न लावता वाहन रस्त्याच्या कडेला उभे केल्याने आणि टेम्पो चालकाचा अतिवेग अशा दोन्ही कारणांमुळे हा अपघात झाला असावा, असा प्राथमिक अंदाज पोलिसांनी व्यक्त केला आहे. या प्रकरणाचा अधिक तपास पोलीस करत आहेत.