Theur : हवेली हादरली! कदमवाकवस्तीतील जेके सेल्सच्या गोडाऊनला भीषण आग; २ कोटींचे नुकसान

Theur : ग्रामपंचायत हद्दीतील शिवम हॉस्पिटलच्या परिसरात, पुणे-सोलापूर महामार्गालगत असलेल्या जेके सेल्सच्या गोडाऊनला काल रात्री सव्वा दहा वाजण्याच्या सुमारास अचानक आग लागल्याची घटना घडली. या आगीत सुमारे २ कोटींच्या इलेक्ट्रॉनिक्स वस्तू जळून खाक झाल्याने ऐन दिवाळीत दुकानदारावर मोठे संकट कोसळले आहे.

येथील जे. के. सेल्स इलेक्ट्रॉनिक्स वस्तू विक्रीच्या दुकानातून टीव्ही, फ्रिज, वॉशिंग मशीन, कुलर, एसी, पिठाची गिरणी, फॅन, गिझर, फिल्टरसह अनेक इलेक्ट्रॉनिक्स वस्तूंची विक्री केली जाते. या दुकानाचे गोडाऊन शिवम हॉस्पिटलच्या रस्त्यावर आहे. या गोडावूनमध्ये अंदाजे २ कोटींहून अधिक रुपयांचा माल ठेवलेला होता.

Pune : शनिवार वाड्यात नमाज पठणाचा व्हिडिओ व्हायरल; मेधा कुलकर्णींची तीव्र प्रतिक्रिया!

गोडाऊनच्या बाहेर वायरचे शॉर्टसर्किट झाल्याचे रविवारी (ता. १९) रात्री आढळून आले आणि गोडाऊनच्या दिशेने जाणारी वायर जळताना दिसली. त्यानंतर नागरिकांनी या घटनेची माहिती जे. के. सेल्सचे संचालक अक्षय काळभोर व फिरोज खान मेटकरी यांना दिली. घटनास्थळावर पोहचेपर्यंत गोडाऊनच्या शटर मधुन मोठ्या प्रमाणात धूर बाहेर येत होता. बघता बघता आगीने रौद्ररूप धारण केले आणि गोडाऊन आगीच्या भक्ष्यस्थानी पडले.

हडपसर येथील अग्निशामक दलाला पाचारण केले, अग्निशामक दलाच्या २ गाड्या अर्ध्या तासाच्या फरकाने आल्या. तोपर्यंत नागरिकांनी पाणी मारून आग विझविण्याचा प्रयत्न केला परंतु, आगीचे तांडव नृत्य सुरू होते. शेवटी गोडावूनची चारही शटर तोडून टाकली आणि वस्तू बाहेर काढण्याचा प्रयत्न केला. परंतु, सर्व वस्तूंनी पेट घेतला होता.

यादरम्यान, फ्रीजमधील गॅसचा स्फोट झाला. त्यावेळी नागरिकांची पळापळ झाली. अग्निशामक दलाच्या जवानांनी पाण्याचा मारा केला अग्निशामक दलाच्या जवानांना आग पूर्णपणे विझविण्यात यश आले. तोपर्यंत आगीत सर्व वस्तू जळून खाक झाल्या होत्या.