T20 World Cup 2026 Points Table: इंग्लंड असलेल्या गटात सुपर 8 फेरीची चुरस वाढली, झालं असं की…

टी20 वर्ल्डकप स्पर्धा 2026 स्पर्धेतील साखळी फेरीचे सामने आता अंतिम टप्प्यात आले आहे. साखळी फेरीसाठी एकूण चार गट असून प्रत्येक गटात पाच संघ आहे. यापैकी आपआपल्या गटात टॉप 2 स्थानी असलेल्या संघांना सुपर 8 फेरीत जागा मिळणार आहे. त्यामुळे आता शेवटच्या टप्प्यात चुरशीची लढाई पाहायला मिळणार आहे. अजून तरी कोणत्याही संघाने सुपर 8 फेरीत जागा मिळवलेली नाही. पण एक एक करून काही संघ या स्पर्धेतून आऊट होत आहेत. येत्या दोन दिवसात हे चित्र स्पष्ट होईल. असं असताना गट क मधील सुपर आठ फेरीची चुरस वाढली आहे. कारण या गटात सर्वच संघांना सुपर 8 फेरीची संधी आहे. त्यामुळे काय होईल सांगता येत नाही. इंग्लंड स्कॉटलँड सामन्यानंतर या गटात आणखी गुंता वाढला आहे. या गटात वेस्ट इंडिज, इंग्लंड, स्कॉटलँड, इटली आणि नेपाळ हे संघ आहेत.

टी20 वर्ल्डकप 2026 स्पर्धेत वेस्ट इंडिजने आतापर्यत 2 सामने खेळले असून दोन्ही सामन्यात विजय मिळवला आहे. वेस्ट इंडिजच्या पदरात 4 गुण असून नेट रनरेट हा +1.625 आहे. वेस्ट इंडिजचा संघ या गटात अव्वल स्थानी असून सुपर 8 फेरीसाठी एक विजय मिळवला तर स्थान पक्कं होईल. पण दुसऱ्या स्थानासाठी इंग्लंड, स्कॉटलँड, इटली या संघात चुरस असेल. नेपाळने सुरुवातीचे दोन्ही सामने गमावले आहेत. त्यामुळे उर्वरित 2 सामन्यात विजय मिळवला तरंच संधी आहे. पण हे गणित देखील जर तरवर अवलंबून असणार आहे. एखादा मोठा उलटफेर झाला तर या गटाचं चित्र बदलेल. अन्यथा या स्पर्धेतील नेपाळचं आव्हान संपुष्टात येईल.

इंग्लंडने 3 पैकी 2 सामन्यात विजय मिळवून 4 गुण आणि -0.143 नेट रनरेटसह दुसरं स्थान पटकावलं आहे. पण अजूनही सुपर 8 फेरीचं गणित सुटलेलं नाही. इंग्लंडचा शेवटचा सामना इटलीशी होणार आहे. या सामन्यात इंग्लंडचं विजयाचं गणित चुकलं तर स्कॉटलँडला संधी मिळू शकते. स्कॉटलँडचा शेवटचा सामना नेपाळशी होणार आहे. या सामन्यात स्कॉटलँडला काहीही करून विजय मिळवावा लागेल. पण इंग्लंड इटली सामन्याकडे लक्ष ठेवावं लागेल.