परभणीत नर्सिंगचा पेपर फुटला, सुपरवायझरने बहिणाला WhatsApp वर प्रश्नपत्रिका पाठवली अन्... चौघा-पाचांना अटक

परभणी : राज्यात नीट (NEET) आणि टीईटी (TET) परीक्षांमधील गैरव्यवहारांच्या आणि घोटाळ्यांच्या चर्चा थांबत नसतानाच, आता परभणीमधून एक अतिशय खळबळजनक आणि धक्कादायक प्रकार समोर आला आहे. परभणी येथील एका परीक्षा केंद्रावर सुरू असलेल्या जनरल नर्सिंग अँड मिडवाइफरी (GNM) प्रथम वर्ष परीक्षेचा पेपर फुटल्याचे उघडकीस आले आहे. विशेष म्हणजे, ज्यांच्यावर परीक्षा पारदर्शक पार पाडण्याची जबाबदारी होती, त्याच परीक्षा केंद्रावरील एका पर्यवेक्षिकेने (Supervisor) आपल्या सख्ख्या बहिणीला मदत करण्यासाठी प्रश्नपत्रिकेचा मोबाईलवरून फोटो काढून तो व्हॉट्सॲपवर (WhatsApp) बाहेर पाठवल्याचा प्रकार समोर आला आहे.

मिळालेल्या सविस्तर माहितीनुसार, इंदिरा गांधी ए.एन.एम. नर्सिंग स्कूल परीक्षा केंद्रावर जीएनएम प्रथम वर्षाची परीक्षा सुरू असताना हा प्रकार घडला. परीक्षा सुरू झाल्यानंतर अवघ्या काही मिनिटांतच ड्युटीवर असलेल्या राखी चव्हाण या परीक्षा पर्यवेक्षिकेने मोबाईलच्या सहाय्याने प्रश्नपत्रिकेचा फोटो काढला आणि तो व्हॉट्सॲपच्या माध्यमातून आपली बहीण राणी चव्हाण हिच्यासह इतरांना पाठवला. यादरम्यान, परीक्षा केंद्राचे केंद्र निरीक्षक विश्वजीत मठपती हे अचानक तपासणीसाठी (Inspection) गेले असता त्यांना काहीसा संशय आला. त्यांनी संबंधित महिला पर्यवेक्षिकेची कसून चौकशी आणि तपासणी केली असता, तिच्या मोबाईलमध्ये प्रश्नपत्रिकेचा फोटो आढळला. हा गैरप्रकार उघडकीस आल्यानंतर परीक्षा वर्तनात मोठी खळबळ उडाली.

या प्रकरणी तातडीने कठोर पावले उचलत पोलिसांनी महाराष्ट्र विद्यापीठ, मंडळ व इतर विनिर्दिष्ट परीक्षांमध्ये होणाऱ्या गैरप्रकारांना प्रतिबंध करण्याबाबत अधिनियम १९८२ (Maharashtra Prevention of Malpractices at University, Board and Other Specified Examinations Act) आणि संबंधित कलमांन्वये एकूण ५ जणांविरोधात गंभीर गुन्हे दाखल केले आहेत. पोलिसांनी या प्रकरणात मुख्य सूत्रधार आणि सहभागी असलेल्या आरोपींना अटक केली असून, हा पेपर इतर कोणाकोणाला पाठवण्यात आला होता, यात काही आर्थिक व्यवहार झाला आहे का आणि या रॅकेटमध्ये आणखी कोणाचा सहभाग आहे, याचा सखोल तपास नानलपेठ पोलीस करत आहेत.