Solapur Crime : पत्नीसह मुलाची हत्या करून शिक्षकाने स्वतः केली आत्महत्या; सोलापूर जिल्ह्यातील बार्शी शहर हादरलं

Solapur Crime : जिल्ह्यात एक धक्कादायक प्रकार समोर आला असून, एका शिक्षकाने पत्नीसह मुलाचा निर्घृण खून  करून स्वतः आत्महत्या केल्याची प्राथमिक माहिती समोर येत आहे. सोलापूरच्या  बार्शी शहरात ही हृदय पिळवटून टाकणारी धक्कादायक घटना समोर आली आहे. बार्शी शहरातील नाईकवाडी प्लॉटमध्ये ही घटना उघडकीस आल्याने खळबळ उडाली आहे. अतुल मुंडे असे पत्नी आणि मुलाची हत्या करून आत्महत्या करणाऱ्या शिक्षकाचे नाव असल्याचे कळत आहे. विशेष म्हणजे दोघेही मुंडे पती-पत्नी हे शिक्षक म्हणून कार्यरत होते. मात्र, अतुल मुंडे यांनी एवढ्या टोकाचे पाऊल का उचलले याचे कारण अजूनही स्पष्ट होऊ शकले नाही. तर, घटनास्थळी पोलीस दाखल झाले असून, आधी पत्नी आणि मुलाची हत्या करून स्वतः आत्महत्या केल्याचा पोलिसांना संशय आहे. मात्र, याबाबत अजूनही कोणतेही अधिकृत प्रतिक्रिया पोलिसांकडून समोर आलेली नाही. 

सोलापूर जिल्ह्यातील बार्शी शहरात एका शिक्षकाने कुटुंबातील सदस्यांची हत्या करून आत्महत्या केल्याने खळबळ उडाली आहे. बार्शी शहरातील नाईकवाडी प्लॉटमध्ये अतुल मुंडे हे आपल्या कुटुंबीयांसह राहत होते. तर त्यांच्या पत्नी देखील शिक्षका होत्या. मात्र, आज अचानक मुंडे यांच्यासह त्यांच्या पत्नी आणि मुलाचा मृतदेह आढळून आला. दरम्यान, याची माहिती मिळताच पोलीस घटनास्थळी दाखल झाले आहेत. तर, अतुल मुंडे यांनी पत्नी आणि मुलाची हत्या करून स्वतः आत्महत्या केल्याचं पोलिसांच्या प्राथमिक तपासात समोर आले आहे. परंतु, सर्वच बाजूने या घटनेचा तपास करत आहे. 

Prakash Ambedkar : मुस्लिम आणि ओबीसी टार्गेट, 3 डिसेंबरनंतर दंगलीची शक्यता, प्रकाश आंबेडकरांच्या दाव्याने खळबळ

नेमकं काय घडलं? 

बार्शीत घडलेल्या घटनेत अतुल सुमंत मुंडे (वय 40), तृप्ती अतुल मुंडे (वय 35) ओम सुमंत मुंडे (वय 5) या तिघांचा मृत्यू झालंय. प्राथमिक माहितीनुसार, अतुल मुंडे यांनी पत्नी तृप्ती यांची गळा कापून हत्या केली. तर मुलगा सुमंत याच्या तोंडावर उशी ठेवून हत्या केली. त्यानंतर स्वतः गळफास घेतं आत्महत्या केली.  अतुल मुंडे हे करमाळा तालुक्यात जिल्हा परिषद शाळेत शिक्षक होते. तर तृप्ती मुंढे या बार्शीतील अभिनव प्राथमिक शाळेत शिक्षिका होत्या. अतुल मुंडे यांनी हे कृत्य का केलं याबाबतीत पोलीस तपास करीत आहेत.

परिसरात खळबळ...

शिक्षक मुंडे दांपत्य मागील काही वर्षांपासून बार्शी शहरात राहत होते. मात्र, आज अतुल  मुंडे यांच्यासह त्यांच्या पत्नी आणि मुलाचे मृतदेह आढळून आल्याने खळबळ उडाली आहे. दरम्यान, याची माहिती मिळताच परिसरातील नागरिकांनी घटनास्थळी धाव घेतली. तर, पोलीस देखील घटनास्थळी पोहचले आहेत. सोबतच वरिष्ठ पोलीस अधिकारी देखील  घटनास्थळी आले आहेत. या घटनेने परिसरात मात्र खळबळ उडाली आहे. पोलीस आता सर्वच बाजूने तपास करत आहेत.