Shivjayanti 2026: शिवजयंती मिरवणुकीला गालबोट, दोन गट आमने-सामने, नांदेडसह जळगाव जामोदमध्ये घडलं काय?

शिवजयंती २०२६Image Credit source: टीव्ही ९ मराठी

Shivjayanti 2026: देशभरात काल शिवजयंतीचा उत्साह होता. अनेक ठिकाणी डीजे मुक्त आणि पारंपारिक वाद्य वाजवत शिवजयंती साजरी करण्यात आली. अनेक ठिकाणी मर्दानी खेळ सादर झाले. अनेकांनी सामाजिक उपक्रम राबवले. काही तरुणांनी शिवजयंतीच्या निमित्ताने गडकिल्ले स्वच्छता मोहिम राबवली. राज्यातच नाही तर देशात आणि परदेशातही अनेक ठिकाणी शिवजयंती मोठ्या उत्साहात साजरी झाली. रक्तदान शिबिरासह अन्नदान आणि अनेक सामाजिक उपक्रम राबवण्यात आले. विधायक पाऊल अनेक जणांनी टाकले. पण त्याचवेळी हैदराबाद, कर्नाटक आणि राज्यातील काही ठिकाणी शिवजयंती मिरवणुकीला गालबोट लागले. दोन गट आमने-सामने आल्याने वातावरण तापले. तर काही ठिकाणी समाजकंटकांनी मिरवणुकीला अडथळा आणण्याचा प्रयत्न केला.

नांदेडमध्ये पोलिसांचा लाठीमार

नांदेडमध्ये शिवजयंती मिरवणुकीत पोलिसांनी सौम्य स्वरूपाचा लाठीमार केला. या घटनेचे व्हीडिओ सोशल मीडियावर व्हायरल झाले आहेत. विना परवाना लावलेला डीजे काढण्यास पोलीस गेले होते, त्यावेळी तरुणांनी त्याला विरोध केला. यावेळी पोलिसांनी सौम्य स्वरूपाचा लाठीचार्ज केला. मात्र या घटनेनंतर युवकांनी तीव्र संताप व्यक्त केलाय. पोलीस जाणीवपूर्वक आम्हाला टारगेट करत आहेत असा आरोप युवकांनी केला. तर विनापरवाना लावलेला डीजे ताब्यात घेत असताना डीजेचे सामान पळून नेत असल्याने आम्ही रोखण्याचा प्रयत्न केल्याची माहिती भाग्यनगर पोलिसांनी दिली आहे.

शिवजयंतीच्या मिरवणुकीत नाचण्याच्या कारणावरून दोन गटात वाद

बुलढाणा जिल्ह्यातील जळगाव जामोद तालुक्यातील पिंपळगाव काळे गावात रात्री छत्रपती शिवाजी महाराज जयंती निमित्त काढण्यात आलेल्या मिरवणुकीत नाचण्याच्या कारणावरून दोन गट आमने-सामने आले होते. यावेळी मोठा तणाव निर्माण झाला होता. मात्र पोलिसांनी तात्काळ हस्तक्षेप करत परिस्थिती नियंत्रणात आणली, सध्या पिंपळगाव काळे गावात शांतता असून कुठल्याही अफवांवर विश्वास न ठेवण्याचे आवाहन पोलिसांनी केलं आहे. तर ठिकठिकाणी पोलिसांनी बंदोबस्त लावला आहे .

पन्हाळ गडावर हुल्लडबाजी

तर पन्हाळ गडावर शिवजयंतीच्या उत्साहात काही तरुणांकडून हुल्लडबाजी करण्यात आली. पन्हाळ गडावरून ज्योत घेऊन येत असताना सायलेन्सरची पुंगळी काढून हुल्लडबाजी करणाऱ्यांच्या दुचाकी गावकऱ्यांनी फोडल्या. या भागात कर्णकर्कश सायलेन्सर वाजवत अतिउत्साही तरुणांकडून हुल्लडबाजी करण्यात येत असल्याचे समोर आले आहे. याप्रकरणी शिवप्रेमींनी संताप व्यक्त केला आहे.

[embedded content]