Rahul Gandhi Speech: ‘भारत मातेला विकून टाकलं..’, अमेरिकी ट्रेड डीलवर संसदेत भडकले राहुल गांधी

लोकसभेचे विरोधी पक्षनेते राहुल गांधी यांनी बुधवारी सभागृहात भाषण केलं. सभागृहात बोलताना राहुल गांधी यांनी अमेरिकेवर निशाणा साधलाच पण केंद्रातल्या मोदी सरकारवरही हल्लाबोल केला. “अमेरिकेच्या दबावाखाली केंद्र सरकारने ट्रेड डील केलीय. भारताने त्यांचं ऐकलं नाही तर ते पुन्हा टॅरिफ वाढवतील. अमेरिकेची नजर भारताच्या डेटावर आहे” असं राहुल गांधी म्हणाले. “मी इकोनॉमिक सर्वे पाहत होतो. मला त्यात दोन गोष्टी दिसल्या. पहिली गोष्ट म्हणजे आपण अशा जगात राहतोय त्यात जियोपॉलिटिकल संघर्ष वाढतोय. अमेरिकेच्या दबदब्याला चीन, रशिया आणि दुसऱ्या शक्ती आव्हान देत आहेत. दुसरी गोष्ट म्हणजे आपण एनर्जी आणि फायनान्शिअल शस्त्रांच्या दुनियेत वावरतोय. आपण स्थिरतेच्या विश्वातून अस्थिरतेच्या जगात चाललो आहोत” असं राहुल गांधी म्हणाले.

“प्रत्यक्षात आपण युद्धाच्या काळात जगतोय. तुम्ही पाहू शकता युक्रेनमध्ये युद्ध सुरु आहे. गाजामध्ये युद्ध आहे. मिडिल ईस्टमध्ये युद्ध आहे. इराणमध्ये युद्धाचा धोका आहे. आपण ऑपरेशन सिंदूर केलं. आपण अस्थिरतेच्या विश्वात जगतोय. डॉलरला आव्हान दिलं जातय. माझे मित्र समजतायत, मुख्य खेळ हा आहे की डॉलरला आव्हान दिलं जातय. US च्या दबदब्याला आव्हान दिलं जातय. आपण सुपरपावरच्या विश्वाकडून कुठल्या नव्या देशाकडे जातोय. त्याचा आपण अंदाज लावू शकत नाही” असं राहुल गांधी म्हणाले.

पॉपुलेशन एक संपत्ती असू शकते

“US आणि चीनच्या स्पर्धेत सर्वात महागडी गोष्ट भारतीय डेटा आहे. अमेरिकेला सुपरपावर म्हणून टिकून रहायचय. अमेरिकेला आपले डॉलर वाचवायचे आहेत. त्यांच्यासाठी भारतीय डेटा महत्वाचा आहे” असं राहुल गांधी म्हणाले. “मला आठवतय बरेचसे लोक बोलायचे की, लोकसंख्या एक ओझं आहे, लोकसंख्या डिजास्टर आहे. पण पॉपुलेशन एक संपत्ती असू शकते. ही एक ताकद आहे. पण तुम्ही त्याचा डेटा ओळखता, तेव्हाच ती ताकद आहे” असं राहुल गांधी म्हणाले.

आम्ही तुमचे नोकर आहोत असे तुम्ही बोलू नका

“जर इंडिया अलायन्सची प्रेसिडेंट ट्रम्प यांच्यासोबत चर्चा सुरु असती, तर मी तुम्हाला सांगतो, आम्ही पहिलं काय केलं असतं, सर्वात पहिलं आम्ही प्रेसिडेंट ट्रम्पला बोललो असतो, या इक्वेशनमध्ये सर्वात जास्त महत्वाचा आहे इंडियन डेटा. तु्म्हाला तुमचा डॉलर वाचवायचा असेल, तर आम्ही तुमचे मित्र आहोत. आम्ही तुम्हाला तुमचा डॉलर वाचवायला मदत करु शकतो. तुमच्या डॉलरला वाचवू शकते अशी गोष्ट इंडियन लोकांकडे आहे. जर, तुम्हाला या डेटाचा एक्सेस हवा असेल, तर चर्चा समान पातळीवर झाली पाहिजे. आम्ही तुमचे नोकर आहोत असे तुम्ही बोलू नका” असं राहुल गांधी म्हणाले.