Pune–Solapur Highway : 7 भुयारी अंडरपासला मंजुरी; स्थानिक व मुख्य मार्गावरील वाहतूक होणार वेगळी

Pune : पुणे-सोलापूर महामार्गावरील वाढती वाहतूक कोंडी फोडण्यासाठी जून 2025 मध्ये हडपसर ते यवत दरम्यान उड्डाणपूल उभारणीला मंजुरी देण्यात आली होती. त्यानंतर आता या महामार्गावर आणखी एका महत्त्वाच्या प्रकल्पाला सुरुवात करण्यात आली आहे. पुणे-सोलापूर महामार्गावर सात ठिकाणी अंडरपास म्हणजेच भुयारी मार्ग बांधण्यात येणार असून, या कामाला आता प्रत्यक्ष सुरुवात झाली आहे. या प्रकल्पासाठी सुमारे 150 कोटी रुपयांचा खर्च अपेक्षित आहे.

पुणे-सोलापूर राष्ट्रीय महामार्गावर दिवसेंदिवस अपघातांची संख्या वाढत असून, हे अपघात रोखण्यासाठीच या सात अंडरपासची उभारणी करण्यात येत आहे. यापैकी तीन अंडरपासचे काम पूर्ण झाले असून, उर्वरित चार अंडरपासचे काम सध्या वेगाने सुरू आहे. या भुयारी मार्गांमुळे महामार्गावरील वाहतुकीचा कालावधी कमी होणार असून प्रवास अधिक वेगवान होईल. यासोबतच अपघातांची संख्या घटेल आणि इंधनाचीही बचत होणार आहे.

Maharashtra Politics : सपकाळांनंतर आणखी एक निष्ठावंत शिलेदार पक्षाबाहेर; उद्धव ठाकरेंना पुन्हा मोठा धक्का

यापूर्वी जून 2025 मध्ये मंजूर करण्यात आलेला हडपसर ते यवत उड्डाणपूल प्रकल्प हा पुणे-सोलापूर महामार्गावरील तीव्र वाहतूक कोंडी कमी करण्यासाठी प्रस्तावित करण्यात आला होता. या प्रकल्पासाठी एकूण 5,232 कोटी रुपयांचा खर्च मंजूर करण्यात आला आहे. मात्र, जूनमध्येच प्रकल्पाच्या विस्ताराला मंजुरी मिळाल्याने उड्डाणपुलाची लांबी सुमारे 4.5 किलोमीटरने वाढणार आहे. या दोन्ही प्रकल्पांमुळे महामार्गावरील वाहतूक अधिक सुरळीत होण्याची अपेक्षा व्यक्त केली जात आहे.

पुणे-सोलापूर महामार्गावर दररोज सुमारे 40 ते 50 हजार वाहनांची ये-जा होते. पश्चिम आणि पूर्व महाराष्ट्राला जोडणारा हा एक महत्त्वाचा मार्ग असून, तो राज्यासह देशातील अनेक भागांना जोडतो. कर्नाटक, आंध्र प्रदेश आणि हैद्राबादसारख्या भागांकडे जाण्यासाठी हा महामार्ग प्रमुख दुवा मानला जातो. त्यामुळे या महामार्गावर अंडरपास उभारणे अत्यंत आवश्यक ठरत होते.

कसे असतील हे अंडरपास?
पुणे-सोलापूर महामार्गावर एकूण सात अंडरपास बांधण्यात येणार असून, त्यापैकी तीनचे काम पूर्ण झाले आहे. प्रत्येक अंडरपास सुमारे 30 मीटर रुंद आणि 5.5 मीटर उंच असेल. बॉक्सच्या स्वरूपातील या भुयारी मार्गांच्या वरून महामार्गावरील मुख्य वाहतूक सुरू राहणार असून, खालील मार्ग स्थानिक वाहतुकीसाठी खुला असेल. मुख्य व स्थानिक वाहतूक वेगवेगळ्या मार्गांवरून सुरू राहिल्याने वाहतूक कोंडी मोठ्या प्रमाणात कमी होणार आहे. प्रत्येक भुयारी अंडरपाससाठी अंदाजे 20 कोटी रुपयांचा खर्च येणार आहे.