Pune Railway : प्रवाशांच्या सुरक्षेसाठी बंद केलेली सुविधा ठरली महागात; रेल्वेला मोठा फटका, १४ स्थानकांवर परिणाम

Pune : रेल्वे स्थानकावरील गर्दी कमी करण्यासाठी उन्हाळी सुट्टी, दिवाळी, छट सण अशा गर्दीच्या काळात प्लॅटफॉर्म तिकीट विक्रीवर रेल्वे प्रशासनाने निर्बंध आणले होते. त्याचा फटका रेल्वेला प्लॅटफॉर्म तिकीटामधून मिळणाऱ्या उत्पन्नावर झाला आहे. गेल्या वर्षात प्लॅटफॉर्म तिकीटाचे उत्पन्न 14 टक्क्यांनी घटल्याचे दिसून आले आहे. तरीही प्रवासी सुरक्षिततेच्या दृष्टीकोनातून रेल्वेने या उत्पन्नावर पाणी सोडल्याचे दिसत आहे.

रेल्वेचा प्रवास स्वस्त आणि सुरक्षित असल्यामुळे प्रत्येक जण रेल्वे प्रवासाला प्राधान्य देतात. मध्य रेल्वेतील पुणे हा एक महत्त्वाचा विभाग आहे. त्यातही पुणे रेल्वे स्थानक देशातील पहिल्या दहा रेल्वे स्थानकांपैकी एक समजले जाते. त्यामुळे या ठिकाणी मोठी गर्दी असते. रेल्वेच्या प्लॅटफॉर्म विना तिकीट प्रवेश केल्यास दंड केला जातो. त्यामुळे प्रवाशांसोबत आतामध्ये जाणाऱ्यांकडून प्लॅटफॉर्म तिकीट काढले जाते. यामधून रेल्वे प्रशासनाला प्रत्येक वर्षी कोट्यावधी रुपयांचे उत्पन्न मिळते. पण, गेल्या वर्षीपासून रेल्वे प्रशासनाने प्रवाशांच्या सुरक्षेच्या दृष्टीकोनातून आणि योग्य नियोजन करता यावे म्हणून गर्दीच्या वेळी प्लॅटफॉर्म तिकीट बंद केले जात आहे. त्याचा फटका 2025 मध्ये बसल्याचे दिसत आहे.

Washim : वाशिम हादरले! स्टेशन परिसरात महिलेवर अत्याचारानंतर क्रूर हत्या; पोलिसही घटनास्थळी थक्क

पुणे रेल्वे विभागाला 2025 मध्ये एप्रिलपासून डिसेंबरपर्यंत प्लॅटफार्म तिकिटामधून सुमारे दोन कोटी रुपयांचे उत्पन्न मिळाले आहे. गेल्या वर्षी याच काळात रेल्वेला सव्वा दोन कोटी रुपयांचे उत्पन्न मिळाले होते. यंदा प्लॅटफॉर्म तिकिटामधून मिळणारे उत्पन्न २५ लाखांनी घटल्याचे दिसत आहे. उन्हाळी सुट्टी, दिवाळी, छट पूजेच्या काळात पुणे रेल्वे स्थानकावरील प्लॅटफॉर्म तिकीट बंद केल्याचा हा फटका बसल्याचे दिसत आहे. पण, उत्पन्नापेक्षा प्रवासी सुरक्षा महत्त्वाची असल्यामुळे रेल्वेकडून गर्दीच्या वेळी हा निर्णय घेतला जात असल्याचे रेल्वे अधिकाऱ्यांनी सांगितले. प्लॅटफॉर्मवर होणाऱ्या गर्दीचे व्यवस्थापन हे या निर्बंधांचे उद्दिष्ट असल्याचे अधिकाऱ्यांनी स्पष्ट केले.

चौदा स्थानकांवर तिकीटबंदी
राज्यात पुणे रेल्वे स्थानकासह छत्रपती शिवाजी महाराज टर्मिनस, दादर, लोकमान्य टिळक टर्मिनस, ठाणे, कल्याण, पनवेल, नागपूर, नाशिक रोड, भुसावळ, अकोला, सोलापूर, कलबुर्गी आणि लातूर या १४ रेल्वे स्थानकावर प्लॅटफॉर्म गर्दीच्या वेळी अधून-मधून तिकीट विक्री बंद करण्यात येते. मात्र, यामध्ये वयोवृद्ध व्यक्ती, ज्येष्ठ नागरिक, आजारी व्यक्ती, लहान मुले, निरक्षर व्यक्ती आणि महिला प्रवासी ज्यांना एकट्याने प्रवास करता येत नाही. अशांचा प्रवास सुलभ व्हावा या हेतूने सदर निबंधांमधून विशेष सूट देण्यात आली होती.