नागपूर: पुण्याच्या नर्सिंग विद्यार्थिनीला नागपुरात बोलावून अपहरण अन् ५० हजारांची खंडणी वसूल!

नागपूर: इन्स्टाग्रामवरील ओळख आणि प्रेमाच्या जाळ्यात ओढून पुण्यात शिकणाऱ्या एका नर्सिंग विद्यार्थिनीचे अपहरण केल्याची धक्कादायक घटना नागपूरमध्ये समोर आली आहे. या प्रकरणी पोलिसांनी अवघ्या काही तासांत आरोपी तरुणाला बेड्या ठोकल्या असून विद्यार्थिनीची सुटका केली आहे.

पोलिसांकडून मिळालेल्या माहितीनुसार, यवतमाळ जिल्ह्यात राहणारी तरुण तरुणी पुण्यात नर्सिंगच्या अभ्यासक्रमाला आहे. तिचे वडील शेती करतात. महिनाभरापूर्वी तिची जिशानसोबत इन्स्टाग्रामवर ओळख झाली होती आणि दोघांत प्रेमसंबंध निर्माण झाले होते.

 

दरम्यान, जिशानने तिला नागपुरात भेटण्यासाठी बोलाविले. 'सायंकाळपर्यंत घरी येते', असे सांगून ती पुण्यातून नागपूरला पोहोचली. त्यानंतर जिशानने तिला गणेशपेठ परिसरात गाठले आणि विविध आमिष दाखवून सोबत रामटेकला नेले. तिथे गेल्यानंतर त्याने तरुणीचा मोबाईल फोन काढून घेतला.

यानंतर जिशानने तरुणीच्या वडिलांच्या मोबाईलवर संपर्क साधून, "मुलगी सुखरूप हवी असेल तर ५० हजार रुपये द्यावे लागतील," अशी मागणी करत खंडणी मागितली. घटनेचे गांभीर्य लक्षात घेऊन पोलिसांनी तातडीने सूत्रे हलवली आणि अपहरणकर्त्यास जेरबंद करून विद्यार्थिनीची सुखरूप सुटका केली.