Pune : पुण्यात खासगी ट्रॅव्हल्ससाठी बदलले नियम! नवीन रूट सिस्टमची अंमलबजावणी सुरू

Pune : शहरातील वाहतूक कोंडी दूर करण्यासाठी खासगी ट्रॅव्हल्स आणि लक्झरी बसेसना नवीन मार्ग, थांबेव्यवस्था आणि पिक अवर्समध्ये कठोर निर्बंध लागू करण्यात आले आहेत. त्याची अंमलबजावणी सुरू केली असून, नागरिकांकडून हरकती सूचना मागवून अंतिम आदेश लवकरच जाहीर केला जाणार आहे.

रस्त्यावर होणारी बसेसची गर्दी आणि पिक अवर्समध्ये कोंडीच्या पार्श्वभूमीवर वाहतूक शाखेच्या कार्यालयात ट्रॅव्हल्स असोसिएशनच्या पदाधिकाऱ्यांसमवेत नुकतीच बैठक घेण्यात आली. त्यात झालेल्या चर्चेनुसार नवा आदेश काढण्यात आला आहे. त्यानुसार १५ नोव्हेंबरपासून अंमलबजावणी सुरू केली आहे.

Mumbai : बिग अपडेट! ख्रिसमसपासून नवी मुंबई विमानतळावर उड्डाणांची सुरुवात; जाणून घ्या फ्लाइट डिटेल्स

पुढील १५ दिवसांत नागरिक, संस्थांकडून हरकती सूचना मागविण्यात येतील. त्यानुसार अंतिम आदेश काढण्यात येणार आहे, अशी माहिती अतिरिक्त पोलिस आयुक्त मनोज पाटील आणि पोलिस उपायुक्त हिंमत जाधव यांनी दिली.

शहरातून सुटणाऱ्या लक्झरी बसेससाठी नवे मार्ग

१) मित्रमंडळ चौक (स्वारगेट) - सातारा रस्ता

मार्गावरील थांबे : मित्रमंडळ चौक, कात्रज सर्प उद्यान.

मार्ग : व्होल्गा चौक- मार्केटयार्ड - सातारा रस्ता- कात्रज चौक- नवले पूल- नवीन कात्रज बोगदा

२) पद्मावती पार्किंग - सोलापूर रस्ता

मार्गावरील थांबे : भैरोबानाला, शेवाळवाडी

मार्ग : व्होल्गा चौक, सातारा रस्ता, मार्केटयार्ड चौक- वखार महामंडळ- गंगाधाम- लुल्लानगर- वानवडी - भैरोबानाला-पेट्रोल पंप - युटर्न – हडपसर

३) पद्मावती पार्किंग - मुंबई- पुणे महामार्ग मार्ग

मार्ग : दांडेकर पूल- सेनादत्त चौक- म्हात्रे पूल- नळस्टॉप- पौड रस्ता चांदणी चौक - मुंबई- पुणे हायवे

अतिरिक्त थांबा : नाही

४) अहिल्यानगर रस्ता

थांबा : संगमवाडी पार्किंग

मार्ग : सादलबाबा चौक- डॉ. बाबासाहेब आंबेडकर चौक गोल्फ चौक शास्त्रीनगर नगर रस्ता - वाघोली

अतिरिक्त थांबे : खराडी बायपास, वाघेश्वर पार्किंग

५) वारजे जंक्शन - अहिल्यानगर रस्ता

मार्ग : डॉ. बाबासाहेब आंबेडकर चौक, कर्वे रस्ता, पौड फाटा, एसएनडीटी लॉ कॉलेज, सेनापती बापट रस्ता, संचेती चौक- संगमवाडी पार्किंग, सादलबाबा चौक, गोल्फ चौक, शास्त्रीनगर चौक, नगर रस्ता वाघोली.

बाहेरील शहरांतून येणाऱ्या बसेससाठी मार्ग -

मुंबई - आळंदी रस्ता - वाघोली रस्ता

थांबे : संगमवाडी, खराडी, वाघेश्वर पार्किंग

मुंबई- सोलापूर रस्ता

थांबे : संगमवाडी, खराडी बायपास, शेवाळवाडी

मुंबई - सातारा रस्ता

शहरात प्रवेश नाही; फक्त पुणे- बंगळूर बायपास मार्गे पुढे प्रवास.

महत्त्वाचे निर्बंध

- दिलेल्या मार्गाव्यतिरिक्त ट्रॅव्हल्स बसेसना शहरात प्रवेश नाही.

- सायंकाळी ६ ते १० या पिक अवर्समध्ये कोणत्याही मार्गावर लक्झरी बसेसना प्रवेश बंद.

- कोणत्याही बसथांब्यावर तीन मिनिटांपेक्षा जास्त थांबण्यास सक्त मनाई.