Pune Metro : मेट्रो विस्तारासाठी ५१७ कोटींचा निधी मंजूर; हिंजवडी–शिवाजीनगर, पिंपरी, स्वारगेट—मार्ग कुठे, कसे असतील

Pune : येत्या मार्च महिन्यात पुणेकरांना एक विशेष भेट मिळणार आहे. पुण्यातील हिंजवडी ते शिवाजीनगर मेट्रो लाईन लवकरच सुरू होणार असून प्रवासाचा वेळ लक्षणीरित्या कमी होणार आहे. हिंजवडी ते शिवाजी नगरपर्यंत प्रवास करायला सध्या 2 तास लागतात. हा वेळ सरळ अर्ध्या तासावर येणार आहे. त्यासोबतच काल जाहीर केलेल्या अर्थसंकल्पात पुण्यातील मेट्रो मार्गिकेचा विस्तार करण्यासाठी 517 कोटींचा निधी देण्याची घोषणा केली गेली आहे.

मेट्रो 3 मार्चमध्ये
मार्चमध्ये सुरू होणाऱ्या नव्या मेट्रो आणि या विस्तारामुळे येत्या काही वर्षांत पुणेकरांचा प्रवास अधिक सुखकर होणार आहे. हिंजवडी ते शिवाजीनगर मेट्रोच्या चाचणी फेऱ्या यशस्वीपणे पूर्ण झाल्या आहेत. डॉ. योगेश म्हसे यांच्या अध्यक्षतेखाली या चाचण्या पूर्ण झाल्या असून मार्चच्या उद्घाटनासाठी सज्ज झाली आहे.

Pune : खाकीला कलंक! पुण्यात पोलिस हवालदार ACBच्या ताब्यात; २५ हजारांची लाच घेताना रंगेहाथ पकडला—प्रकरण काय?

ही मेट्रो मार्गिका शिवाजीनगरला पुण्यातील राजिव गांधी IT पार्कशी थेट जोडणार आहे. या मार्गावर दररोज IT कर्मचाऱ्यांची वर्दळ असते. त्यामुळे या मार्गावर वाहतूक कोंडीही खूप होते. 2.2 लाखाहून अधिक कर्मचारी या मार्गावर प्रवास करत असतात. 800 कंपन्यांमध्ये काम करणाऱ्या या कर्मचाऱ्यांना फायदा होणार आहे.

विद्यापीठ चौकात या मेट्रोवरती डबल डेकर वाहतूक मार्ग उभारणार आहेत. यामुळे सर्वाधिक वाहतूक कोंडी असलेल्या भागातील कोंडी फोडण्यात यश मिळणार आहे. यामध्ये सर्वात खालच्या स्थरावर स्थानिक वाहनांची वाहतूक, त्यावरील उड्डाणपूलावर आणखी एक वाहतूक मार्ग आणि त्यावरती मेट्रो मार्गिका असणार आहे. या मार्गिकेवर एकूण 23 स्थानके आहेत. संपूर्ण मार्गासाठी 14 ट्रेनसेट तयार असून पुणेकर आतुरतेनं या मेट्रोची वाट पाहत आहेत.

कसा होणार विस्तार?
काल सादर केलेल्या अर्थसंकल्पात महा मेट्रोच्या दुसऱ्या टप्प्याचा विस्तार करण्याबाबत माहिती देण्यात आली. सध्या पुणे आणि पिंपरी चिंचवडमध्ये दोन मार्गिका सुरू असून, तिसरी प्रवाशांसाठी लवकरच सुरू होईल. तसेच, 2027पर्यंत पिंपरी-निगडी अशी 4.5 किमी लांब मेट्रोचं काम पूर्ण होण्याची शक्यता आहे. या मार्गिकेचं 50 टक्के काम सध्या पूर्ण झाले आहे. मेट्रोच्या दुसऱ्या टप्प्यात विस्तारामध्ये खडकवासला-स्वारगेट-खराडी, रामवाडी-वाघोली-विठ्ठलवाडी, वनाज-चांदणी चौक आणि नल स्टॉप-वारजे या प्रमुख मार्गांचा समावेश आहे.