Pune IT Company Fire : पुण्यात आयटी कंपनीला भीषण आग, अग्निशमन दलाच्या 4 गाड्या घटनास्थळी

Pune News: पुण्यामध्येआयटी कंपनीला आग लागल्याची घटना समोर आली आहे. पुण्यातल्या विमाननगर भागामध्ये ही घटना घडली आहे. आगीची माहिती मिळताच अग्निशमन दलाच्या गाड्या घटनास्थळी दाखल झाल्या आहेत. अग्निशमन दलाच्या जवानांकडून आग विझवण्याचे शर्थीचे प्रसत्न सुरु आहेत.

मिळालेल्या माहितीनुसार, पुण्यातल्या विमाननगर भागातील फिनिक्स मॉलच्या शेजारी असलेल्या एका खासगी आयटी कंपनीला आग लागली आहे. दुपारी साडेबाराच्या सुमारास ही आग लागली. मार्व्हल एज कमर्शियल कॉम्प्लेक्सच्या पार्किंग एरियामध्ये ही आग लागली. काही वेळातच ही आग बिल्डिंगच्या इतर मजल्यावर पसरली. कंपनीला आग लागल्यानंतर 2000 कर्मचाऱ्यांना तातडीने बाहेर काढत सुरक्षित ठिकाणी हलवण्यात आले आहे. सध्या ही आग नियंत्रणात आली असून कुलिंग करण्याचे काम सुरू आहे.

या आगीचे कारण अस्पष्ट आहे. आगीची माहिती मिळाल्यानंतर अग्निशमन दलाच्या जवानांनी घटनास्थळी धाव घेतली. आग आटोक्यात आणण्यास अग्निशमन दलाच्या जवानांना यश आले आहे. आग लागल्यामुळे विमाननगरच्या या परिसरातील वाहतूक विस्कळीत झाली असून घटनास्थळी नागरिकांनी मोठी गर्दी केली आहे. अग्निशमन विभागाच्या अधिकाऱ्यांनी दिलेल्या माहितीनुसार, आग विझवण्यासाठी चार फायर इंजिन मार्व्हल एज कमर्शियल कॉम्प्लेक्समध्ये तैनात करण्यात आलेत.