Pune : भोंदूबाबाकडून महिलेवर लैंगिक अत्याचार; कौटुंबिक वाद सोडवण्याच्या बहाण्याने ५० लाखांची फसवणूक

Pune : अंगात दैवीशक्ती असल्याचा बनाव करून कौटुंबिक वाद सोडवण्याचे आमिष दाखवत एका भोंदूबाबाने महिलेवर लैंगिक अत्याचार केल्याचा आणि तब्बल ५० लाख ५५ हजार रुपयांची फसवणूक केल्याचा धक्कादायक प्रकार उघडकीस आला आहे. या प्रकरणी स्वारगेट पोलिस ठाण्यात गुन्हा दाखल करण्यात आला आहे.

औदुंबर मनोहर गडदे (वय ४३, रा. तरटगाव, ता. पंढरपूर, जि. सोलापूर) असे आरोपीचे नाव आहे. याबाबत ४२ वर्षीय महिलेने फिर्याद दिली आहे.

पोलिसांनी दिलेल्या माहितीनुसार, पीडित महिला आणि तिच्या पतीमध्ये कौटुंबिक वाद असल्याने ते वेगळे राहत होते. सुमारे पाच वर्षांपूर्वी एका ओळखीच्या व्यक्तीमार्फत तिची आरोपीशी ओळख झाली. त्यावेळी आरोपीने स्वतःला ‘देवऋषी’ असल्याचे भासवून “माझ्या अंगात दैवीशक्ती आहे, मी तुमचे कौटुंबिक प्रश्न सोडवतो,” असा विश्वास महिलेला दिला.

विश्वास संपादन केल्यानंतर आरोपीने महिलेला स्वारगेट परिसरातील एका लॉजवर बोलावून तिच्यावर लैंगिक अत्याचार केल्याचा आरोप आहे. त्यानंतर लोणेरे, उत्तेखोल आणि माणगाव परिसरातील विविध लॉजवर बोलावून वेळोवेळी अत्याचार करण्यात आल्याचे तक्रारीत नमूद आहे.

गुंतवणुकीच्या आमिषाने लाखोंचा गंडा
कौटुंबिक वाद मिटवण्याबरोबरच नोकरी लावून देण्याचे आणि बांधकाम व्यवसायात गुंतवणूक केल्यास चांगला परतावा मिळवून देण्याचे आमिष आरोपीने दाखवले. मे २०२१ पासून रोख रक्कम व दागिन्यांच्या स्वरूपात त्याने महिले कडून एकूण ५० लाख ५५ हजार रुपये उकळले.

फसवणूक झाल्याचे लक्षात आल्यानंतर अखेर पीडित महिलेने ११ एप्रिल रोजी स्वारगेट पोलिस ठाण्यात तक्रार दाखल केली. पोलिसांनी गुन्हा नोंदवून पुढील तपास सुरू केला आहे.

सावध रहा!
अंधश्रद्धा आणि भोंदूबाबांच्या आमिषांना बळी पडू नका, असे आवाहन पोलिसांकडून करण्यात येत आहे.