Pune ;- खरातनंतर आणखी एका भोंदूबाबाचा पर्दाफाश! ‘दोष दूर’ करण्याच्या बहाण्याने महिलांसोबत गैरप्रकार

Pune Crime | Pune : नाशिकमधील अशोक खरात  प्रकरणाने राज्य हादरले असतानाच आता पुण्यातही असाच धक्कादायक प्रकार समोर आला आहे. खेड  तालुक्यातील एका भोंदूबाबाचा काळा कारनामा उघड झाला असून महिलांच्या श्रद्धेचा गैरफायदा घेत लैंगिक शोषण केल्याचा गंभीर आरोप करण्यात आला आहे.

चांडोली येथील शिवदत्त आश्रमात नवनाथ गवळी  हा स्वतःला महाराज म्हणून सादर करत होता. ‘दोष निवारण’ करण्याच्या नावाखाली महिलांना फसवून त्यांच्यावर अत्याचार केल्याची तक्रार समोर आली आहे. ३४  वर्षीय पीडित महिलेने खेड पोलीस ठाण्यात याबाबत गुन्हा दाखल केला आहे.

 

तक्रारीनुसार, मे २०२५  पासून पीडित महिला कुटुंबासह आश्रमात जात होती. १७  जुलै २०२५  रोजी पहाटे जप करत असताना आरोपीने तिचा विनयभंग केला. तसेच ‘अंगातील दोष दूर करायचे असतील तर शारीरिक संबंध ठेवावे लागतील’ अशी घृणास्पद मागणीही केल्याचा आरोप आहे.

कुटुंबाच्या भीतीपोटी महिला काही काळ गप्प राहिली. मात्र, आरोपीकडून सतत फोनद्वारे त्रास होत असल्याने आणि खरात प्रकरण समोर आल्यानंतर तिने धैर्याने पोलिसांकडे धाव घेतली.

पोलिसांच्या प्राथमिक तपासात धक्कादायक बाबी समोर आल्या आहेत. आश्रमात महिलांच्या अंगात ‘शक्ती येते’ असा आभास निर्माण करून त्यांच्यावर मानसिक ताबा मिळवला जात होता आणि त्यानंतर ‘दोष निवारण’च्या नावाखाली शोषण केलं जात असल्याची माहिती आहे.

खेड पोलिसांनी आरोपीवर विनयभंगाचा गुन्हा दाखल केला असून सध्या नवनाथ गवळी  फरार आहे. पोलिसांकडून त्याचा शोध सुरू असून प्रकरणाचा सखोल तपास केला जात आहे. या घटनेने परिसरात एकच खळबळ उडाली आहे.